倒董集會有成千人參加，喺目前咁嘅經濟氣候，成績不過不失，不過正如香港第一才子蕭若元話頭：冇錯，𠵱家倒董力量組織，唔係主流，但如果阿董繼續蒲頭，言行不斷再挑釁港人，倒董力量好快就會變為主流。
倒董集會嗰一千人，只不過係煤氣爐熄咗機，留低嘅嗰一點藍色火種。若然社會氣氛有變，隨時撻番着，到時唔單止啲水即時滾熱番，重分分鐘煤氣爐大爆炸㖭。
國家挺董，都經已盡晒力，𠵱家睇兩樣嘢：經濟復甦可唔可以持續，令到明年頭一季失業率降低到百分之六至七咁上下；第二，明年立法會選舉，全港選民會唔會對民建聯喺「7.1」前後與全港市民利益對抗嘅保皇行為集體失憶。
經濟復甦？話咁易咩。「屍爬」只係益零售業同飲食業，呢兩大行業，只係需要非技術勞工。就算國家遊客成千上萬咁繼續殺落嚟，珠寶行同酒樓一直好生意落去，呢一行請人，流動性好高。經過六年衰退，零售業同飲食業嘅老闆，一係就繼續將人工壓價，一係就以短期計嚟請人，就住就住，以防一有反覆，再度裁員。
經濟復甦始終要個樓市起番。全面要香港人買番樓，已經冇乜可能。第一，人工唔會一下大幅反彈，銀行按揭七成不變，除非飲食同零售嘅工作人口，個個好有安全感兼有橫財，否則一定唔敢買樓。重有呢兩三年買咗樓坐緊艇嘅業主，想趁機掟番貨，二手樓同小型單位樓價，唔使旨意回升，未來幾年，啲跨國公司會多啲搬嚟香港，定係多啲搬出香港？豪宅貴價樓嘅前景會點？
迪士尼樂園落成，冇錯，會有一批美國高層行政人員搬過嚟住。不過有地產專家指出，迪士尼樂園係特區政府做老襯出土地兼做大股東，迪士尼只不過出管理資源，既然條大數由政府孭起，咁迪士尼同自己高層租樓，就梗
毋須倒董，阿董喺7.1嗰日，實際上已經倒咗。最好笑嘅，就係居然有個人喺大埔揸快車，俾差人捉到，佢就自稱係阿董表弟。大佬，六年以來，阿董揸住香港呢架車，搞經濟發展大躍進，八萬五、母語教學、改革呢樣、摧毀嗰樣，已經超速揸快車搞到車毀人亡咯。
揸快車，重敢認阿董個表弟？「的」到入差館，落口供嘅阿Sir分分鐘自己都做咗負資產，一聽到就火起，隨時叫夥計質佢幾槌呀因住！
傳真︰2623-9278
電郵︰