電盈貝沙灣開盤以嚟，推廣活動都好有心思，且走高檔路線，噚日又搞咗個「西班牙情懷天」嘅活動。雖然𠵱家主力銷售二期，不過今次嘅活動，就係為第一期嘅業主而設。物業雖未入伙，買家參加活動時，可以喺售樓處遠距離望吓自己日後嘅安樂窩。
為咗配合西班牙主題，發展商專程由西班牙請咗個舞蹈團嚟表演，個團叫做BalletAlbaicin，佢哋會表演傳統嘅西班牙舞，夠晒特別。
發展商重話，呢個團喺西班牙好出名，以往都有嚟亞洲表演，嚟香港就係第一次，而且只演一場。
除咗舞蹈團之外，重有拉丁樂隊獻唱，可以配合番個主題。至於一家大細嚟睇樓嘅準買家，唔少細路仔都好享受拉丁音樂，其中幾個重圍埋一齊，氹氹轉咁跳舞，自得其樂。
發展商搭建示範單位，愈嚟愈有心思，唔少買家只要遇到啱心水嘅單位，都會出價洽購。
香港興業東涌藍天海岸，搭咗個相連戶示範單位，獲外籍機師垂青，想出價據為己有，但係俾香港興業拒絕。興業市務經理林紅話，雖然呢位外籍機師好有誠意洽購，但係樓盤重要開放畀買家參觀，所以暫時唔賣。
個相連戶示範單位係五座五十五樓C及D室，二千二百一十七呎，裝修連家具價值六十萬至八十萬。貴價單位惜售，但上車貨就肯割愛，設喺三座嘅一房示範單位，最近則以一百三十萬沽出。
物業管理公司為提升質素，好多時都會參加一啲認證計劃，啟勝管理主動參加水務署嘅食水系統優質維修計劃，旗下中半山帝景園第一至五座及會所，同西半山愛敦大廈，都攞到水務署發出嘅認可證書。
呢個計劃係由水務署訂定評核準則，證書有效期一年，若有關樓宇嘅供水系統維修妥善，證書就可以免費延長一年。
另外，置邦物業話，佢哋公司有定期接受多個著名嘅獨立審核機構進行獨立審核，包括香港品質保證局，重有怡和集團指定嘅獨立風險管理機構同核數師等。
中原地產同統計處合作研究，將人口普查資料展示喺中原地圖內，𠵱家已經有得睇。聽中原地產執行董事張奕威講，傾咗成年，重要同好似律政署等唔同部門傾先至搞掂。合約年期係五年，中原除咗要畀費用政府外，所有展示統計資料數據嘅分頁，都唔可以賣廣告。
張奕威話，明年政府做中期人口調查，啲資料若果想展示喺中原地圖度，雙方又要傾過至用得。
𠵱家中原地圖每日嘅瀏覽次數係三十幾萬張，比之前增加一倍，估計加入新資料後，每日有機會可以去到五十萬張以上。張奕威話，呢個全新介面，若果用IE5.5或以上嚟睇，效果會最好。佢又透露，希望第四季可以喺地圖內加入住宅成交紀錄，等呢個網上地圖更互動。
另外，網上地圖最近多咗中原個Logo，聽講係因為太多人下載嚟用，但又唔註明資料嚟自中原地圖，先至有此一着。
香港置業啱啱成立「投資移民銷售專組」，十零日已經接到一百七十九個查詢，大部份係手持外國護照嘅內地豪客，同一批東南亞客，包括台灣、馬來西亞同新加坡等，當中六成半有意買新樓，想買二手樓嘅只得三成半，情況就同香港人上大陸買樓多數買新樓一樣。
至於投資金額，半數諗住投放六百五十萬至八百萬，八百餘萬至一千萬嘅亦有三成，至於一千萬以上的超級豪客亦有兩成。口講無憑，查詢者會唔會真係落實投資，言之尚早。
蘭西
電郵地址：
