劉兆佳失蹤咗一陣，最近又同啲傳媒敍舊，人人都忍唔住問佢係咪意興闌珊，想返大學教書？
佳叔澄清話冇呢回事，佢只係話過，到佢學識乜嘢叫政治管理嘅時候，可能又夠鐘下台。據知，佳叔同中大只係請咗三年假，做阿董智囊，博唔博得過？定係唔人唔鬼，好易兩頭唔到岸？換言之，最理想係阿董三年內提早落台，阿佳就可以返中大，但睇中央挺董咁挺法，阿佳就要陪佢癲落去，陪跑夠四年，中大條後路又斷埋。
至於佢老友李明堃，亦都由理工借咗去中央政策組做顧問，兩個一齊同老董度橋，但係就未見有乜嘢大突破。大學係象牙塔，啲學者評論政治，口水多多，叫佢埋身做阿董智囊，就個個好似劉兆佳咁垂頭喪氣，學者埋身救得到阿董，國家又使乜搞「屍爬」？
上周四晚佳叔已經知道楊永強事件冇彎轉，八方提醒佢重有政改嚟緊，點知佳叔話十點佢夠鐘走，要回家休息，下次再傾，睇嚟好似冇乜心情。
傳真︰2623-9278
電郵︰