生產電腦顯示屏的唯冠國際（334），近期股價走勢非常靚，上周五再升4.7%，重上2元水平。
小初起初以為因為大市氣氛好，所以唯冠先至升．但公司在周末有消息公布，原來唯冠與美國摩托羅拉結盟，一齊發展資訊家電市場。
唯冠今次泊得大碼頭，將以摩托羅拉作品牌，利用本身設備及網絡產銷液晶（LCD）電視機、DVD機及汽車用顯示器等產品，同唯冠向來主要做生產大有分別，但掂唔掂則仍有待時間考驗。
雖然好消息已經曝光，但經紀黃話隻股仍未炒完，稍後唯冠公布全年業績，據講亦會靚到不得了，唔排除會炒業績，股價繼續有得去。
小初對唯冠後市走勢始終有些少保留，可能因為喺佢身上輸過錢，所以偏向壞方面諗，唯冠截至今年6月全年業績靚，其實一早估到，皆因隻股中期業績賺7328萬元，比去年同期勁升2.67倍，所以全年業績靚已係預期之內，到時未必有好大刺激。
慕容小初