大廚黃師傅，貌似「儍強」，但一啲都唔儍；除咗煮得一手出色嘅粵菜之外，重識得煮外省菜兼西餐，更大膽地放棄穩定嘅酒店中菜部大廚一職，嚟到呢間新開張嘅中式料理大搞新式Fusion中菜。至於點解夠膽咁冒險……真係忍唔住要用「儍強」口吻演繹一次黃師傅嘅答案：「無嘢𠺝，做廚師嘅嘢，最緊要有挑戰性吖嘛。」
記者：馬慶武 攝影：楊錦文
同樣有下午茶、點心、燒味同埋小菜，「大八方」聽落同一般酒樓無分別，但睇睇呢度嘅環境同餐牌，就知呢間中國料理有幾潮幾有性格。據負責人講，「大八方」指喺呢度可以食勻中華大八方嘅美食，呢度大部份菜式都加入咗Fusion元素，或者用獨特材料，務求每道菜都咁不平凡。
黃師傅入廚28年，一直努力研究粵菜，曾經喺九龍塘會、逸東酒店中菜部做過大廚，其間不忘偷師：「中國地大物博，要識晒咁多種外省菜，實在唔易。我鍾意煮嘢食啫，所以會珍惜學嘢嘅機會。」黃師傅話當年喺九龍塘會會所當中廚嘅時候，西廚部就喺正隔籬，公餘會過去同西廚交流吓，增加對西餐嘅了解。「之後喺酒店做粵菜，會同邀請來港煮食的國內名廚，交流炮製外省菜嘅心得。」黃師傅話「交流」機會多，令佢接觸多咗外省菜同西菜，所以𠵱家嚟「大八方」創製Fusion中菜時，組合和配搭可以好多變化。
黃師傅因乜放棄穩定又舒服嘅酒店工作呢？負責人梁小姐話：「呢度班老闆都係二十幾三十歲嘅後生仔，全部係柴灣教育學院酒樓管理課程嘅畢業生。開呢間新風格嘅『酒樓』，就係希望跳出傳統框框，創出中菜館新路向。」而黃師傅亦都好支持呢個新概念：「喺酒店做到悶喇，嚟呢度可以創新菜式，不斷嘗試同改良，充滿樂趣。」黃師傅話每個新菜式都帶畀佢無限新鮮感同挑戰性，所以煮起嚟特別起勁。
呢味扣鵝掌同煎羊扒一樣可以因應不同人數Order不同份量，黃師傅話係為咗食客一次可以試多幾樣菜式而設。經醬油燜過嘅紅燒肉，咬落軟腍多汁，肥肉部份勁香口。而鴨掌則用火腿、老雞、蠔油熬製嘅上湯燜過，而且時間掌握得好，鴨掌肉質非常爽口。
用糯米酒、茄汁、豆瓣醬製嘅四川魚香汁，多數只用嚟炒蝦球，𠵱家配煎羊扒一樣咁香，重可以辟羶。「中式酸甜味」配上煎羊扒，重會無咁「漏」㖭，食多幾件都得。
回鍋肉×煙鴨胸×片皮鴨食用方法嘅Fusion作品，煙熟嘅鴨胸肉腍得嚟肉味濃，加上回鍋肉嘅調味料，辣辣哋已經夠晒刺激惹味。不過，黃師傅話用食片皮鴨嘅方法──包埋軟綿綿嘅薄餅一齊食，咁先係最高享受。雖然係中式食法，但賣相就好似土耳其卷。
口感味道好似馬拉糕一樣咁鬆軟香甜，不過就多添咗薰衣草嘅香味。
一片片切開嘅大腸有啲似瓦片屋簷，大腸內釀有蝦膠及芋茸，炸起嚟大腸彈牙、蝦膠爽口、芋茸鬆化，三重口感集合一齊，咬落重散發荔芋香味。
大八方中國料理
地址：新界青龍頭豪景花園商業大廈２字樓
電話：24911085
營業時間：
星期一至五11:00am-12:00mn；星期六、日8:00am-12:00mn
