自從上個月班亞弗力（BenAffleck）同籮霸珍妮花洛庇絲（JenniferLopez）取消婚禮後，佢兩個一直避見傳媒，雖然近排都有狗仔隊影到呢對經歷風風雨雨嘅情侶喺喬治亞州嘅豪宅附近出現，但係前日喺公眾場合齊露面，都算係佢哋出事之後嘅第一次。
雖然班仔同籮霸預咗實俾啲記者煩住，不過佢哋實在屈得太耐，兼且又有班仔嘅至愛波士頓紅襪隊出場，所以點都要出嚟趁吓熱鬧。
前日係美國職棒聯盟總決賽第三場賽事舉行嘅日子，由波士頓紅襪隊主場迎戰紐約楊基隊，着住紅襪隊外套嘅班仔特別喺下巴留咗一撮鬚換吓形象，而籮霸就依然係咁明豔照人。
其實佢兩個以前都成日睇波，記得四月底波士頓紅襪隊嘅比賽同五月NBA湖人對馬刺嘅西岸季後賽準決賽，對球類運動冇乜興趣嘅籮霸都有陪男友一齊睇，不過嗰時佢哋成場波都攬埋一嚿談心，卿卿我我，望住對方重多過望住場入面啲球員。但係今時唔同往日，唔知係佢哋嘅感情由濃轉淡，定係場波太精采，籮霸頭岳岳四圍望，而班仔就成場鬼咁投入猛咁嗌，但係可惜最後紅襪隊都要輸三比四。
另外，最近網上面流傳一張籮霸嘅走光相，張相影到着住短裙嘅籮霸，落車時露出下體，連佢發言人都話張相好真！