今日推介隻有權升1倍嘅Call輪，就係恒生Call輪9911。先睇正股，恒生（011）過去1周跌1.50元，收95.75元。1周計，滙豐（005）升2.5元，中銀（2388）升35仙，東亞（023）升40仙。市場錢多，大市未玩完，落後藍籌始終會俾芬佬踢番上去。而且，恒生PE一向高過晒其他大銀行，𠵱家則低過晒其他3大，亦遲早會同佢哋睇齊或者再超越佢哋。
恒生標準Call輪得9911同9162兩件，冇得揀，要隻9911。隻輪明年4月到期，輪價89仙，零溢價，唔係低槓桿率，而係有10.8倍。零溢價，係因為明年到期之前，正股會有1次末期息派發，即使係咁，都唔應該咁快零溢價。未來幾個月，博正股升10%，唔係冇機會。正股升10%，隻輪就值1.8元，有升100%潛力。短炒，唔望多住，望正股升5元，隻輪就升56%。恒生升5元，亦唔太難，滙豐過去兩周計埋就已經升咗5元（恒生升得1.5元咁大把）。
恒生另外隻Call輪9162，去周五首日登場成交細好多，亦係明年4月到期，輪價31.5仙，溢價7.7%，槓桿率30.4倍，當然比唔上9911。
暫時冇其他新推介對象，近期推介嘅滙豐Call輪9845、長實Call輪9065、電盈Call輪9791，未升盡，繼續揸住，有平貨則要加碼。
章盛