三年多前，陳錦鴻離開無綫，簽了中國星做經理人，不過發展平平，最近他重返無綫，簽下基本藝員約三年，拍劇量共一百二十集，集數很少。
離巢前，陳錦鴻每集薪酬約一萬元，今次回巢，身價有傳被降至每集八千，陳錦鴻坦言：「錢係少過以前，相比番通縮就多咗啦，因為只係少咗好少，根本大家都冇爭持價錢，我覺得畀多咗㖭呀。」
降價回巢，難免令人猜想是陳錦鴻發展不如意所致，簽約中國星之後，他在港人氣大跌，只拍過一部慘仆電影《天有眼》，票房僅得二十四萬左右，反而只跟中國星簽經理人約的古天樂卻成公司愛將，拍戲比他多幾倍，陳錦鴻對此只說：「佢做到吖嘛，我簽中國星嘅目的係要佢哋幫我賺錢，我喺出面拍劇，比起無綫時多咗幾倍。」
不過，相對而言，亦會覺得他在港的事業陷入低潮，陳錦鴻笑說：「咁你要唔要身體好先，以前我喺無綫拍劇，平均每日開工二十個鐘頭，日日都係咁，再過兩、三年，我一定會出事，所以就出去試吓，至少儲到錢。今次返去，難得人哋又肯賞識，返去可以keep番知名度，我𠵱家開酒樓，有曝光會有幫助。」
從前陳錦鴻曾一度被列入師奶殺手之列，這次重返娘家，他會否有爭雄之心，挑戰陶大宇登上一哥寶座？他聞言笑道：「挑乜戰呀，冇可能，我做呢行冇假想敵嘅，我係一個自信唔大，某程度上重係有啲自卑嘅人。從來又唔鍾意同人爭嘢，除咗一次想做張無忌之外，我有同公司自薦，我想拍係因為想向鄭少秋致敬，佢係一個影響我好深遠嘅人，由細到大都睇佢嘅戲，但嗰時公司要我拍《創世紀》，結果就畀吳啟華做咗囉。」
陳錦鴻近年對玄學風水之事甚感興趣，他新開的酒樓，是年前羅傑承在港晶中心所開的「香港拼圖」餐廳之舊址。前年結業後，該舖位一直空置，有人形容該處是死位，沒有店舖做得長，陳錦鴻左計右計，他覺得沒問題，況且那兒的租金夠平。
原來「陳大師」心中有數，之前中心內有多少間店舖執笠，有多少人蝕大錢，但他偏偏不信邪，因為世上有門學問叫風水學，他說：「嗰度會轉運，二○○四年就會變好。」於是他還請人擺風水陣，但不知這個陣，又是否真的能夠打破死局呢？
撰文：朱倬誼 攝影：何國豪
場地提供：帝苑酒店