向來走高性能開篷跑車路線嘅本田S2000，一直備受車迷追捧，但由推出至今已有一段時間，或多或少會予人看膩之感；廠方有見及此，最近便宣布為其推出Facelifted新版，以滿足車迷口味。
從外形而言，雖然新版S2000與原有型號沒多大分別，但當細心留意下，不難察覺新車一組頭燈改由多盞圓燈組合而成，襯以略作改動嘅頭泵把、新款17吋跑車合金胎軨、換裝上白底嘅車旁指揮燈等等，從而令車子造型望落更見吸引呢！至於車廂方面，廠方亦有作出適量改動，不但令乘坐舒適性有所增加外，設備配搭亦變得更見齊全易用呢！
另一方面，新車一台2.0公升直4DOHC引擎，動力輸出充裕（馬力250匹）之餘，由於懸掛系統經過強化，以及改換上17吋輪胎組合，行車循迹性及操控表現，會較舊有型號更上一層樓；唔知香港代理方面，何時會將之引入呢？