荷李活過氣型男班亞弗力（BenAffleck）自從同籮霸珍妮花洛庇絲（JenniferLopez）拍拖之後，已經俾籮霸將佢本來嘅爛仔形象，改造到變成另一個人，從前嘅不羈型格已經無可復見。
唔知係咪因為呢個原因，法國歐萊亞美容集團近排一擲一百五十萬美金（約一千二百萬港元），請咗班仔做佢哋嘅洗頭水代言人，個新廣告重啱啱擺咗上網度任人睇（
話說呢個洗頭水廣告嘅內容，係講述班仔無論點俾人摷佢嘅頭髮，都一樣咁貼服自然，當中佢重用一副情聖樣同個靚女模特兒不停咁接吻，鬼咁煙韌，但亦相當「娘」，睇到我羅拉起晒雞皮。
不過班仔都好有自知之明，喺拍呢個廣告之前，已經一早講定個廣告唔可以喺美洲出現，因為佢怕呢個核突樣會俾人笑，我羅拉睇完呢個廣告之後，完全理解班仔嘅憂慮。
據知唔少人睇過呢個廣告之後，不約而同幫班仔起咗個「荷李活姿整佬」嘅新朵，真係當之無愧。