中學出計爭取小學生，小學出計搶幼稚園生，如此循環發展，十年後，大學就要搶中六中七生，搶唔到，學位就要外地生（包括大陸）嚟填補。校長W度橋部署明年招收中一生之餘，對一啲自稱「高中學院」竟然招收中一生，甚為激氣。
校長W話：「既然叫得做高中學院，佢哋應該只收中四至中七學生，有乜理由今年竟然收中一新生吖？實情係呢類直資學校唔夠人讀，驚執笠，教統局又驚佢哋唔掂，所以特別批准佢哋收中一生，即係話，原本應該係普通文法中學嘅客源，都俾直資高中學院截埋糊，你話死唔死。」
高中學院呢條橋，唔知係邊個諗出嚟嘅，𠵱家成為四不像，唔怪得教育界立立亂。
怪力亂神嘅重有某間小學校長。校長W有個校友嘅學生係記者，今年中一派位宣佈之日，奉命採訪派位情況，例牌影一啲家長喊苦喊忽，大叫不公平嘅派位現象。
成班記者去到某間小學，校長同佢哋講：「好唔公道呀，我哋呢個好學生，全級考第一百名，竟然派唔到band1中學！」然後猛叫記者去訪問呢位小學生，小學生一面茫然，唔知大人講緊乜嘢。
記者覺得呢個校長係做騷，為學生帶來不必要嘅壓力，記者同校長W講：「佢間學校好巴閉咩，全級考第一百名都嘈得咁大聲！」校長W為之苦笑，教育同工博出位，有時甚為過份也。