踏入10月成個Game場好似完全靜晒！事關各大Game廠擺明車馬，蓄勢待發等11、12月聖誕檔前夕，一氣過將所有大作推出做勢兼谷銷量，大家辛苦啲餓住Game先啦！
今個星期注目度稍高嘅新Game，只有PS2嘅《侍2》同《古裝古惑仔》推出，玩家評價都叫OK啦！街價$360-$370，可以一玩；另外雖然重有《DanceDanceRevolution》($390)，不過相信都係陪跑性質居多！
下星期美版有隻「啤」正發哥嘜頭嘅《臥虎藏龍》，而且重係全機種人人有得玩，價錢約$380，希望到時有人返貨啦！
Nokia最新人氣「打機手機」—N-Gage，真係可以用無孔不入形容，除咗手機舖之外，估唔到竟然連傳統Game舖都賣埋一份，真係打破過往所有傳統！
另外，Nokia重落重鎚，擺咗好多「試玩臺」喺Game場入面，去貨情況好多舖頭都話幾好，講真街價$2,788，手機、Mp3Player、打機瓣瓣掂，拉勻條數部機唔算貴。
SONY喺12月將會推出強化版多合一式「家電」—PSX，簡單啲講佢係一部集DVD錄影機、PS2-50000、內置硬碟機嘅混合體；暫時資料所知，佢會分為內置160GB硬碟嘅DESR-5000（售價79,800日圓，約港幣$5,187），同內置250GB硬碟嘅DESR-7000（售價99,800日圓，約港幣$6,487）。
以一部DVD錄影機價錢而論，就唔算太貴，不過普遍行家都認為佢「炒唔起」！講真部機似家電多過似遊戲機，再加上佢只係行NTSC制式，香港用家真係無福消受囉！
文：打機鐵人