阿董喺7.1大遊行後開口埋口都話要搞公關、搞形象，不過講咗咁耐，除咗見佢嗰招「龜縮大法」相當成功，盡量令市民淡忘佢嘅「乞人憎」形象，拉番高啲民望之外，真係睇唔到有乜嘢改善。
就好似噚日授勳儀式咁，成班記者喺禮賓府門口等老董講番兩句，點知佢經過講句例牌對白「早晨、早晨」就走咗去，當時在場成班記者唔知好嬲定好笑。點解？因為當時係已經係中午十二點幾，斷估老董都係問吓記者「食咗飯未呀？」「一陣同你哋講吓！」之類，有乜理由係早晨？唔通佢老人家有特異功能，可以一路授勳一路瞓覺，到授完勳先瞓醒咁神奇？
噚日有份受勳嘅警隊一哥曾蔭培，同樣最鍾意搞形象，但同老董比，真係一個天，一個地。淨係睇一哥失驚無神主動捧住佢嗰一歲零四個月大嘅孫女Emma走埋記者前面任影任問，呢招阿董真係拍馬都追唔上。之後，一哥嗰金紫荊星章扣唔穩跌咗落地，記者即刻執番起同佢戴上，一哥又好識趣咁同記者講：「多謝你幫我授勳。」𠱁到班記者鬼咁開心，乜嘢叫搞公關、搞形象，好心阿董向一哥學吓嘢啦！
傳真︰2623-9278
電郵︰