喺市場力量下，任你有天大本領，如果要同個市抗衡，分分鐘被挾到血流成河。咁多外資流入，恒指逢關破關，如無意外，恒指喺下個星期中前應該升上萬二點。
上星期啲二三線股仔係咁喺市場抽水，唔知係唔係因為市場資金太過充裕，好多隻喺批完股後，個價都企得好硬淨，傳聞話有機會批股嘅新海康航業（119），上個禮拜升咗上嚟後更愈傳愈真。呢隻股仔過去幾年比較沉寂，班大戶諗咗好耐，最後都係諗住用航運業復甦呢個藉口嚟踢番郁隻股，上個星期隻股喺9毫子水平一升就升上個一，買盤非常積極。
伏勝試下問番班行家點睇呢隻股仔，不過好多行家覺得隻股重係醞釀階段，可以留意吓，好處係隻股喺呢兩年無點樣令班炒家輸過錢，街外冇乜蟹貨，所以要炒上應該唔難，佢哋話可以睇個半水平。
早前有ValuePartner入股嘅華豐紡織（364），雖然被大股東減持漏報單嘢搞到好多入咗股嘅機構投資者好唔「合皮」，不過聽聞佢哋已經同班「芬佬」講掂數，喺幾個大隻佬嘅支持下，上個星期喺跌至最低9毫2後即彈番上嚟，交投重突破近期嘅平均成交量，有跟開呢隻股嘅朋友打電話嚟報料，話佢哋又係時候開車，今次喺安撫好班機構投資者後，話要追番原有嘅計劃，繼續喺歐美地區見「芬佬」，個價重會配合番，首個目標價就係上返個二，如果個價落返個一樓下，大家不妨考慮一下。
伏勝