嚟緊XBOX連氣有兩隻猛Game出籠，兩者同為舊作新版重新演繹，一隻「舞刀」，波斯王子全立體動作，單人匹馬挑妖兵；一隻「弄槍」，《RainbowSix3》新任務新武器，圍剿恐怖分子；雖然兩隻Game都要10月尾、11頭先推出，筆者有幸搶先試玩，好等話俾大家知乜嘢叫「新」經典！
記者：朱崇德
價錢：$299
發售日期：10月28日
發行商：智高遊戲
開發商：UbiSoft
遊戲平台：XBOX
遊戲種類：第一身射擊
R6一直都係PC第一身擊遊戲中王者，今次重新移植XBOX上，當然唔會原隻照Dub咁失策！3個月前筆者試過「7成功力」De-Bud版，感覺已經係畫面靚到無倫；嚟緊10月28號正式版《RainbowSix3》將會推出，今次測試碟完成度有95%，感覺同PC版更是大異其趣！
基本故事內容，都係講玩家是國際知名的反恐部隊—Rainbow6，將會去到世界各地進行反恐戰爭，與別不同處，係遊戲以線形路線進行，唔似PC版咁放你去一個「遊樂場」嘅大地方，自生自滅搵人打！
De-Bud版測試時隻Game只有一、兩個版圖，今次新版已經基本齊全；單人模式有14個版圖，多人模式則另有9個版圖，全部均以城區巷戰做主戰場；遊戲版圖絕大部份都係新設計，間中夾雜一啲「舊版圖」（例如Airport，IceBase等），老手雖然有似曾熟悉感，不過玩落會發覺呢度無端多條路，嗰度忽然跳個恐怖分子出嚟，跟住當然係俾人HeadShot啦，真係一步一驚心！
射擊Game最令人留心當然係槍械設定，有軍事專家TomClancy's做後盾，槍支設定好真實！新槍推介M203，彈數唔多，但射出後會做成一定範圍火圈，成大斑敵人一次「燒焦」，極好用！同PC版唔同處，係玩家一身帶十幾支槍，輕機、重機、Sniper隨時換！
「多人作戰模式」係此Game重點之一，以往PC版只可以一味打恐怖分子，XBOX版好玩之處，係新加咗自定遊戲模式，當中包括有進攻、防守及保護人質，同一個版圖多出三種不同玩法，對RainbowSix3老玩家嚟講，一樣可以有新體驗。
