一廳幾房容納幾十人、又請嚟前乜乜酒店大廚坐鎮、再唔係就將「餐廳」裝修得美輪美奐，香港嘅私房菜愈開愈多，亦愈嚟愈有規模，但私房菜獨有嘅「私房」風味卻已蕩然無存，只剩下濃烈嘅商業味道。最近深水埗區就開咗區內第一間私房菜，以家庭式經營、大廳只得一張餐枱、大廚兼老闆只係一位識飲識食嘅退休水手，煮嘅亦只係最拿手嘅家常菜，回歸原點，充滿「傳統」私房菜風味。
記者：馬慶武 攝影：陳智良
開呢間私房菜之前，大廚姚先生行咗幾十年船，之後亦做過幾年機械維修。聽到呢度，你可能會同筆者一樣擔心：「咁佢煮嘢掂唔掂㗎？」，「放心！我行船之前曾經當過兩年廚師，之前亦學過中、西廚，加上我自細已經勁鍾意搵好嘢食，對食都好有研究㗎。」姚先生話除咗有做廚經驗之外，亦有不斷偷師：「做咗幾年廚師覺得太辛苦，所以轉行行船囉，不過我都仍然繼續四圍搵好嘢食，去到邊食到邊，中西式都食，食到好味嘅就會問吓人，偷吓師，研究吓點整。」所以姚生話嚟佢呢度食私房菜，除咗中菜之外，都可以預先Order西餐，佢一樣可以為客人準備西式菜單。
行船去過世界各地好多地方，但係姚生始終鍾情中菜，覺得最啱香港人口味：「好似我喺希臘食過大大串燒羊髀，係好過癮，又夠惹味，不過味道勁濃又勁羶，唔啱香港人胃口嘛。」不過除咗中菜外，菜單中亦有葡式菜。葡菜同樣得姚生歡心，可能因為姚太係中葡混血兒：「我太太鍾意食佢家鄉嘅葡國菜，所以我就曾經喺澳門跟一個葡菜大廚朋友學整紅腰豆豬手、葡式咖喱呢啲菜式。」姚生更極力推介佢嘅秘製咖喱煲，因為用咗十幾種不同香料調製成，無用「現成」嘅咖喱粉或咖喱汁，絕對係原汁原味獨一無二，保證第二度食唔到。
呢度除咗可以食到充滿家庭式私房風味嘅中葡菜外，重可以打牌食雀局私房菜。四個人可以由下午一點打到十點，當中包括一餐三餸一湯嘅私房菜，菜式日日不同。而最正嘅係打足一日食埋飯，都係$480埋單，每人百二蚊，啱晒食雀會雀局餐食到厭嘅雀友。
田雞扣即田雞嘅胃部，肉質超爽口，加上XO醬炒香更加惹味，最啱用嚟送酒。不過要食呢道菜記得早啲打電話預訂，因為姚先生話一隻田雞只有一個田雞扣，所以貨量好少，通常要訂幾日先買到。
改良自四川嘅口水雞，不過就將雞肉換成魚鰾絲及海蜇，辣辣哋又有麻醬香味之餘，重多添一份清新爽口感覺。
葡式燜法加入紅腰豆，每隻豬手都充滿豆香味，豬手燜得好腍，咬落去豬手皮夠彈牙，一啲都唔韌。姚先生話葡式豬手上枱時啲紅腰豆無爆開，咁就代表燜得最靚，時間啱啱好。
問極都唔肯透露半句所用嘅香料成份，呢款自製咖喱汁無乜辣味，但係好香，配埋姚生HomeMade嘅蒜茸包，就夠晒香口惹味。
中式甜品，紅棗香甜而充滿桂花及酒香，試過一粒之後真係忍唔住食唔停口。
地址：深水埗西洋菜北街
電話：96698114（姚太）
收費：$160/位（包6道菜）；$200/位（包8道菜）
雀局私房菜：$480（打牌兼食三餸一湯私房菜）