史浩克04雖然宣布雲達不來梅嘅艾列頓同卡斯達積下季會來投，但就被指當中涉及偷獵成份，隨時面臨德國聯賽會嘅處分。
艾列頓及卡斯達積季尾就同不來梅約滿，史浩克指佢哋屬自由身，於是就簽佢哋。但不來梅認為史浩克違規，因艾列頓同卡斯達積重有約在身，所以史浩克背住佢哋同艾、卡二人斟就唔啱。
我求大俠覺得史浩克咁做好冇品，事關艾列頓同卡斯達積𠵱家有着落，餘下時間重同唔同不來梅搏，實屬疑問；另艾列頓係不來梅主力（八場入七球），如果真係揸流攤，咁不來梅就大鑊！
聽聞就算史浩克真係違規，最多判罰港紙二百三十萬，但人就照簽。換言之，不來梅始終係大輸家，人又冇、錢又冇。
正當其他球隊四圍搵平價外援之際，澎馬流浪突然獲得范志毅加盟。范大將軍以前喺英國搵開十幾萬港幣周薪，肯嚟香港踢波，我求大俠有啲意外。姑勿論呢位前中國隊長嚟港係攝時間又好，另有發展又好，肯定嘅係佢呢幾個月除咗可以提攜後輩外，佢嘅落場亦係球迷之福。
英格蘭二十一歲以下國家隊領隊柏列，除未能帶隊喺二十一歲以下歐洲國家盃外圍賽出線外，連前晚外圍賽最後一仗，對土耳其嘅例行公事都輸埋○比一，八戰得十一分排第三出局！更肉酸嘅係柏列賽後重諗住賴死唔走，叫足總再畀機會佢喎！再咁搞法，英格蘭國家隊重有明天嘅？
計球會成就，羅馬近年只係贏過一次聯賽冠軍，今季重冇份踢歐洲賽！不過佢哋位「王子」托迪，認為自己可以當選今年歐洲足球先生喎！重叫大家睇吓魯爾，幫皇馬贏幾多錦標都無法當選，證明羅馬戰績不濟對佢冇影響。我求大俠就覺得，頒個最自信心爆棚獎畀你重好啦！
意大利傳嚟消息，加盟國際米蘭後發現心臟有問題嘅法迪加，經過幾次檢查後，醫生建議佢休息八個月，提早收「咧」。近年國米都算黑，特別多長期傷兵，好似之前嘅朗拿度、後來嘅高高，都叫做對隊波有過貢獻，𠵱家法迪加草皮都未行過就長唞，國米又要白養球員囉。