劉兆佳自從做咗阿董嘅首席顧問之後，唔單止冇瘦到，反而肥咗，八方問佢點解咁心廣體胖？劉教授話因為忙得滯冇時間做運動。不過，點忙都好，書不可不看，否則佢個中央政策組大可關門大吉，因為冇晒新思維。
八方跟住問呢位國師點睇特區個局，老董又點唔點得醒呢？
點知劉教授話，老董請佢入閣，就係重視政治嘅表現，至於過去一年，佢認定特區政府做咗好多好嘢，但就俾一單23條轉移晒視線。
咁就真係願聞其詳，究竟老董有乜好嘢做咗呢？劉教授話就係統一咗港人就特區經濟發展前景嘅不同意見，𠵱家大家都認同香港要背靠祖國，CEPA同自由行都大受歡迎。吓，咁咪即係經濟上一國一制？
至於沙士調查報告，冇人要負責，咁又點解畫呢？劉教授話特首本來想一步一步嚟，先查真相，做好預防工作，過埋呢個冬天高危時期，就會搵吓有冇人要負責。原來有咁周詳計劃，早通知一聲吖！劉教授話，唔講得係因為怕嚇親人，冇人肯講真話喎。至於老董保住少爺強，出到「經一事、長一智」，坊間有人笑謂如果「經十事」，先至「長十智」，我哋咪有排俾人做實驗？劉教授竟然話此言錯矣，皆因少爺強所長嘅一智乃「大智」，有此大智，以後問題全部可解決！真係點夠國師雄辯。
傳真︰2623-9278
電郵︰