繼日前我哋為大家報道過，日本萬事得車廠會為旗下嘅MPV車系，推出多個新版本以吸引車迷注意後，日前廠方又公布以備受車迷追捧嘅Roadster開篷跑車（即MX-5）為平台，推出一款全新RoadsterCoupe跑車，務求響雙座位跑車市場爭取一席位咁話。
從外形而言，全新RoadsterCoupe跑車嘅造型大致與Roadster相近，但廠方除為其加上硬頂外，另外重跟隨不同版本（包括TypeA、TypeE及TypeS）而加裝唔同款式嘅跑車包圍，從而令賣相變得更吸引；另外值得一提嘅係，TypeA及TypeE特別版，將會分別限量生產200及150部，倍見矜貴呢！至於車廂配搭方面，則與現有開篷版本相近，而機械配搭亦一樣，包括1.6公升型號（125匹）、1.8公升型號（160匹）及1.8公升配4前速自動波型號（154匹），性能表現絕能予人十足信心。當然唔少得重有跑車化懸掛組合，所為你帶來嘅出色操控表現啦！有興趣嘅車迷，不妨留意我哋日後嘅報道喇！