女子組合2R係環球唱片今年力捧新人，佢哋將會喺今個月十七號推出處女細碟，兩姊妹近排除咗忙做宣傳外，連向唱片拆家推銷新碟嘅嘢，佢哋都要親力親為。咁樣瞓身宣傳，睇怕呢鋪都只許成功，不許失敗。
涉入樂壇貪污案嘅環球高層陳少寶同朱國禎噚日約咗班唱片拆家喺尖沙嘴粵海酒店食飯，推銷2R嘅新碟，連2R兩姊妹都喺度，席間陳少寶一如往常咁滔滔不絕推銷佢嘅歌手，睇嚟都冇因官非纏身而被打沉，佢重攞埋2R新碟嘅封套樣辦向拆家猛sell㖭！
有拆家突然問點解平時宣傳好似側重喺細妹Race度，陳少寶解釋話嚟緊會二人行，乜都兩姊妹拍住上，又叫家姐Rosanne唔好介意。
香港從來冇唱片公司會叫歌手出席拆家飯局推銷唱片，陳少寶就話想2R親自介紹自己嘅碟，畀拆家深刻啲嘅印象，不過2R兩姊妹一坐埋位打完招呼就冇乜點出聲，表現幾怕醜，班拆家就好客氣咁不時讚吓佢哋真人好靚女囉。
其實𠵱家香港唱片市道咁差，歌手同唱片公司都各出奇招谷宣傳，但要出席拆家飯局陪食飯就少見啲，2R都算搏！
李燦森噚日喺尖沙嘴出席記者會，佢將會喺音樂劇中扮一隻狗，佢話：「我呢排好留意狗嘅動作，有時會去何超儀屋企睇佢隻狗嘅動靜。我呢個角色有一段好長嘅對白，係我從影以嚟最長，有三頁紙咁長，我都花兩個星期去背。
章小蕙（Teresa）月中會去台灣高雄賣時裝，佢噚日凌晨到咗台灣做準備。Teresa將會接拍楊凡嘅新片《桃色》，楊凡竟然同佢講話章小蕙主演嘅電影冇人會睇，亦唔會有票房，但就會拎套電影去參展。馮仁昭覺得楊凡咁講都啱，章小蕙咁鍾意扮靚showoff，有機會行吓紅地氈出風頭，咁咪啱晒佢囉！
林家聲細仔林潤添自殺之後，前幾日林家聲同太太、大仔林潤笙一齊返咗香港。傳媒連日嚟都見唔到林家聲，噚日大約十二點半，林家聲契仔周振基成班人坐住架七人車去到潤添喺窩打老道嘅故居，半個鐘頭後就原車離開，但係七人車上面就拉起咗窗簾，驟眼睇上面好似有個瘦瘦削削嘅老人家，唔知係唔係林家聲呢！
曹達華噚日八十八歲生日，佢嘅契女陳寶珠日前陪媽咪帶埋個仔一齊幫華叔慶祝生日，華叔嘅生日願望喺希望可以不停咁工作，佢話：「因為工作可以畀到我活力，我有時都會做義工。我嘅生日願望重希望香港經濟繁榮，身體健康。」對於契女陳寶珠肯幫佢慶祝生日，華叔話：「佢好孝順，年年都同我慶祝，佢重畀咗生日利是我㖭。」
何韻詩嘅衣着同個性男仔頭，獲護膚品Neutrogena睇中佢拍廣告已經令人驚奇。廣告商𠵱家重決定加碼，搵佢打頭陣，同陳慧珊、宣萱拍攝共七十集講護膚貼士的廣告短片，總投資重高達千萬元㖭。何韻詩早前喺柴灣影廠拍攝時不改鬼馬搞笑性格，古靈精怪動作多，背對白時高音時低音，又刻意走音，搞到幕後工作人員笑唔停口。
