又話芬佬沽緊工業股獲利，點解眼鏡股泰興光學（389）近日氣勢如虹，股價升完又升，屢創新高？小初唔明走去問經紀黃，但佢笑而不語，最後先至話聽講泰興將在下周初公布收購計劃。
泰興股價近排走勢非常靚仔，噚日最高見過5.50元，收5.45元，升6.86%，成交金額就唔算多，只得655萬元。噚日盤路所見，早排幫泰興搞批股嘅歐資證券行，掛牌密密買入，售後服務真係做得好。
至於泰興今次收購乜嘢？經紀黃就唔肯明言，叫小初自己估，貼士係海外資產。其實市場一早傳聞，泰興今次收購唔離開兩樣嘢，一樣係歐洲分銷網絡，另一樣就係歐洲品牌，答案相信係其中一瓣。
另外，在招股時無聲無息，新聞唔多嘅北泰（2339），噚日首日掛牌，表現一鳴驚人。雖然隻股以招股價上限1.33元定價，但首日上市收1.63元，仍較招股價高出23%，成交金額更高達2.8億元。
經紀黃同小初講，隻股咁旺場唔係純粹炒作，主要係芬佬對呢類汽車零部件出口股，有一定興趣。
慕容小初