東涌藍天海岸舊年首度推出時，曾經舉辦「百萬招募新思維」活動，噚日揭盅頒獎。得獎名句就係「香港人最緊要將自己當成皮球––只要唔洩氣，落到最底，就有反彈的一天。」就憑呢句連埋標點符號都只係得三十三個字，陳小姐就攞咗五十萬獎金。平均每個字連埋標點，值超過一萬五千大元。
最近樓市同經濟都好番啲，似乎應驗咗呢句參賽句子。陳小姐話，好開心呢句說話咁快就可以實現。
另外，噚日嘅頒獎禮重有一位特別嘉賓，係外籍買家VictoriaWoodyatt擔任「藍天新思維大使」。佢重啱啱買咗藍天海岸一個二千二百呎嘅相連單位，呢個新業主來頭唔細，係一位澳洲籍嘅女機師，佢話二千幾個機師中，只有二十幾個係女性，之前租住同區屋苑，至最近先買樓一家大細自住。
華人置業近期賣樓手風好順，上環ManhattanAvenue火速沽清，而土瓜灣都會151未開售，已傳出有大手洽購。聽講，有個喺紅磡區經營茶餐廳嘅大家庭，有意用千一萬，預留其中六伙，其中三個用嚟自住，等家庭成員住近啲，可以互相照應。另外三伙就計劃用嚟收租。
中原地產東南九龍助理營業董事王鎮維話，呢六個單位平均每呎三千一百蚊，租金回報率應該有五厘半。
都會151喺靠背壟道，係單幢樓，僅七十一個單位，面積由五百九十一至複式一千二百零三呎。貨量唔多，相信淨係同區嘅換樓客源已經可以完全吸納。
薄扶林貝沙灣一期早已賣光，但發展商電盈並冇忘記呢批買家，明日重特別搞咗個「西班牙情懷天」活動，請一期買家同親友參加。
發展商專程喺西班牙請嚟費明高舞蹈團BalletAlbaicin，即場為嘉賓表演西班牙舞，配合拉丁樂團，演奏西班牙音樂，同時預備各款西班牙美食招待來賓。已有二百五十人報名。
發展商表示，稍後陸續安排各類型活動招待一、二期買家，等佢哋提早享受擇居貝沙灣嘅情趣。
銷情方面，二期南岸售出五百八十個單位，佔該期總數八成八，明日推出五座A室，一千六百二十一呎，呎價四千八百五十蚊起。
地產代理近日可謂飲得杯落，早排一個月都做唔到一百萬佣，𠵱家輕而易舉就突破呢關。
利嘉閣地產執行董事廖偉強話，今個月唔使一個禮拜，已經有三間分行佣金超過一百萬，全部都係做豪宅嘅分行，分別係又一村、何文田同大圍豪宅分行。
廖偉強認為，原因係政府落實投資移民政策，帶動豪宅即時大旺。做豪宅嘅代理夠晒風光，但做屋邨或者細價樓嘅，暫時到係就得個等字。
蘭西
電郵地址：
