做中學校長薪水非常唔錯，年薪近百萬港元，可以食安樂茶飯。之不過，𠵱家的一般中學（超級名校唔計）嘅校長，壓力極大，壓力源頭有兩個：（一）學生嘅公開試成績，（二）學生數目。學生考試成績欠佳，以前至多俾人彈兩句，你有你彈，我有我講，但係呢兩年香港出生率下降嘅威脅，打到埋身，學生人數唔夠，你話收唔夠學生呀，學校要縮班，老師成為超額（炒魷也），事關重大咯。
呢日碰到校長W，一如過往聲音沙啞，語調低沉，好彩重有精神活力。校長W每日講嘢太多，對教師，對學生，對家長，有時重要對埋記者，有乜辦法唔喉乾舌燥。校長W話：「今年收中一生一額汗，本來派位派夠五班，但竟然有幾十人唔報到及報到後轉學，頭都暈晒，好彩亦可以招生有番三四十人，否則就面青咯。我親自審查學生轉去邊度，知道佢哋轉開嘅學校唔會好得過我校，但弊在家長對我校認識唔夠。今個學期我會多花時間推廣，例如多見家長，等佢哋傳開去畀區內師奶團；多到小學做工夫，多注意家長要求（例如長假期期間，替學生補課）……唉，我去見小學校長，小學校長話佢自己同病相憐，佢要去巴結幼稚園校長喎，總之做校長今時今日嘅最大責任，就係諗計收夠學生，保障教師嘅飯碗。」左丁山話：「教育文憑課程應該開多一科市場學，請商學院教授開課，講解如何搶客（學生）。