昨日輪到和黃（013）推高大市，恒指升135點，收報11935，但成交只有183.7億元，動力唔算特別強，並非好現象。地產股炒過、銀行股炒過、中資電訊股炒過，連和黃都炒埋，下周唔知會唔會翻炒地產股呢？
市場盛傳港府將恢復勾地，而一向極力反對勾地嘅燊哥突然轉軚，內裏可能有景轟。阿虎收到風，政府承諾初期只准勾細幅豪宅地皮，直至市場氣氛進一步好轉，以及中價樓貨尾消化得七七八八後，才讓大幅地皮被勾出拍賣。
更有口痕友話，恢復賣地初期，中資可能會在拍賣場搖旗吶喊，為樓市打氣，到時地產股可能因此更上層樓。其實現時國內大城市如上海、北京樓價已有過熱現象，所以有中資對仍在谷底的本港樓市起痰，十分正常，並非單為挺港。
滙盈（8101）復牌後表現反覆，最後升2.38%，報0.86元。反而佢阿媽新濠國際（200）表現更佳，升9.6%，收報2.275元，成交1120萬元。原先有傳聞話，新濠會向大股東何猷龍收購澳門角子老虎機業務，正式成為本港第一隻澳門賭業股，不過公司發表聲明話：「何先生並無表示於現階段有任何意向進行上述權益注入。」據ｉ師傅講，照計就應該會注入，但相信要等一排才可落實，𠵱家未係時候。
軟庫發展（648）周四宣布，日本軟庫會盡沽手上35%股權。消息一出，股價應聲大跌28%，噚日再跌1.6%。日本軟庫唔玩，長和系作為第二大股東若頂硬上，可能由壞事變好事。
阿 虎