如果唔係楊紫芝喺立法會大爆鄭家富個阿哥鄭家強先至係佢高足，八方都唔知道阿富有個威水大佬。而阿富自己都話諗唔到楊教授會當眾話楊永強讀書唔夠佢大哥叻。
阿富有一個大家姐同三個哥哥，阿爸名叫鄭耀潮，一聽就知道係潮州人，佢哋四兄弟，按「泰誠強富」排，鄭家富最唔鍾意自己個名，覺得好俗氣，唔夠佢哥哥阿強勁。
鄭家強點勁呢？阿富話，由幼稚園起，佢阿哥都未考過第二，次次考第一。三十七歲做英國伯明翰大學醫科教授，係最後生一位，剛好阿富嗰年亦當上立法局議員，佢阿爸阿媽有幾開心，可想而知。
既然個哥哥咁醒，香港又有難，阿富應該請佢返香港，頂咗楊永強個位。點知阿富話，佢哥哥十一月會返港，但唔係返嚟做官，頂多到時會幫佢手喺區選拉票；果然係好兄弟。
傳真︰2623-9278
電郵︰