個市繼續去，靜唔落去，恒指又升135點，是日火車頭係和黃（013），收61.75元，升2.25元。
出色Call輪，自然係和黃Call輪，更巴閉嘅係，10件成交金額最勁嘅窩輪，有6件係和黃Call輪，其他4件係恒指輪。6件最活躍和黃Call輪成交金額共達5.6億元。和黃本身，成交金額15.3億元，排第一，佔大市8%，中移動（941）與滙豐（005）都唔夠佢多。
和黃成交股數大增兩倍，咁嘅成交，擺明啲錢多，谷一兩件大藍籌，個市好難大調整。縱有回吐，都係獲利性質。
不過，睇啲Call輪升幅，唔係個個夠膽撲落去。一路賺開錢嘅炒家，沽一隻買一隻。未賺過錢嘅，最好等有後抽嗰陣，先至諗些少，而且所揀對象，最好唔係搏殺嗰類，即係槓桿率較細嘅。槓桿率細，代表可能賺嘅利潤會細啲，但亦代表萬一撞板，輸嘅情況冇咁傷。
有啲藍籌近期升幅冇咁大，亦有啲由高位回落，佢哋嘅Call輪可以諗吓。中銀（2388）5日升35仙，滙豐（005）5日升2.50元，恒生（011）則5日跌1.5元，恒生Call輪，博得過，冇得揀，得隻9911，下周再講。
章 盛