英格蘭國腳罷踢風波平息，但英國傳媒鍥而不捨，《太陽報》披露前日英軍出發前，碧咸同埋加利尼維利仍然為罷踢一事各持己見，大吵一場。到底呢兩個被公認為死黨嘅前曼聯隊友係咪真係吵大交，定係有人杜撰，恐怕只有當事人自己先知。
據報話碧咸響呢次罷踢風波上好支持李奧費迪南，但唔主張罷踢，日前就以隊長口脗同罷踢態度較強硬嘅加利仔吵咗一場，臉紅耳赤，講到反面咁滯。話晒佢兩個相識於微時，又係宿舍同房，而位置上互相配合，真係friend過打band，就算唔同立場都唔會咁激啩？如果係真，英軍想唔士氣受損都難。
講開碧咸，日前有報道話佢力勸沙加度唔好加盟曼聯，佢話無第二個地方比皇馬更好，呢樣我求大俠就信，至少係沙加度經理人親口講。
羅馬尼亞國腳梅度終於同佢嗰位明星老婆辦好離婚手續，最開心莫過於一班好冧佢嘅倫敦女子。無他嘅，梅度外型唔差，響球場威風八面，型到爆，自然惹來唔少狂蜂浪蝶。據講佢之前響倫敦俱樂部玩樂時，惹來一班女士包圍，搞到有關方面要間個私人區畀佢，免秩序大亂。
國際米蘭嘅烏拉圭國腳列高巴最近添丁，佢嘅太座幫佢生咗第二個囝囝；唔止咁，有報道話志切改革嘅國米會長莫拉堤，已經欽點重用列高巴，睇嚟今季因為傷兼同教練古柏唔啱傾嘅列高巴，可以重見天日囉。
好事成雙，唔知算唔算係囝囝好腳頭呢？
今日呢一輪國際賽有唔少強弱懸殊戲碼，淨係睇意大利對阿塞拜疆、荷蘭對摩爾多瓦讓球讓到離晒譜，查實強隊有無必要贏開巷？我求大俠就好懷疑啦。
連意大利前鋒恩沙基都只係貼自己隊波贏二比○，並唔係大勝。信唔信呢個內幕貼士就你諗你啦。
最近唔少消息都同紐卡素嗰位英格蘭國腳戴亞有關，成為傳媒焦點。不過戴亞認真唔得醒，明知無數部攝影機影住佢，佢着住英格蘭套型仔老西公然打喊路，本來都算，最弊佢打喊路之餘又無用手掌遮遮，俾人影到。柴灣張三李四就無咩所謂，但佢係堂堂國腳，呢次真係出醜囉。