特首董建華早排放假不忘工作，喺錢塘江觀潮時同國務院前總理李鵬密密斟，有人擔心以鎮壓遊行出名嘅李鵬，會教番老董兩招，有人就話唔使擔心，因為按北京傳統，退休領導人唔會再過問政事。
不過凡事都有例外，八方前兩日睇北京出版嘅《電力報》，見到一篇題為「李鵬同志在國家電網公司座談會上的講話」文章，李鵬大談美加大停電同中國電力改革。
呢個話題好似有啲舊，皆因李鵬講話時間係九月十七日，北京傳媒成個月之後先至報道，可能係要經中央批准，因為退休領導人公開講政策真係好少見，加上李鵬一對仔女：李小鵬同李小琳都喺電力企業位居要職，更加要小心處理。
唔知北京傳媒遲啲會唔會刊登文章，講吓李鵬點睇7.1大遊行？
傳真︰2623-9278
電郵︰