黑人女星荷爾芭莉（HalleBerry），最近已經同佢個音樂人老公EricBenet分居，有啲外國傳媒話荷爾係因為同美國樂隊LimpBizkit嘅主音FredDurst發展戀情先搞到分居收場，不過最近我羅拉就八到，原來荷爾捉姦在床，忍無可忍之下先同Eric分居。
近排我羅拉睇開外國報紙嗰陣，發現有報道話荷爾芭莉最近返屋企嘅時候，開門入屋竟然見到兩個身材有佢咁火辣嘅女子，其中一個冇着衫，喺佢屋企走嚟走去，而另一個雖然有着住底衫褲，但荷爾就更加之嬲，因為嗰條女着緊嘅，係荷爾嘅私伙底衫褲！嗰陣Eric都喺間屋，所以呢次就真係捉姦在床，荷爾當然一怒之下就話分居啦。
雖然啲報道講到似層層，但係Eric哥嘅發言人已經即時出嚟否認。不過，無論係食慣拖鞋飯嘅Eric衰，定係對老公變心、𠝹過第二件大隻Rock友嘅荷爾芭莉錯，計我大口羅拉話，當中最大嘅贏家都係LimpBizkit嘅FredDurst，因為咁啱隊Band呢排出新碟，唔使錢就增加唔少見報率啦。