紐卡素剛啱公布咗喺球會一億英鎊營業額中，錄得近二千八百萬鎊（約三億六千萬港元）盈利。球會亦應承喺一月轉會市場重開時，撥一千萬鎊（約一億二千八百萬港元）畀領隊卜比笠臣擴軍買球員！
聽講卜比Sir仍然好欣賞巴塞隆拿前鋒古華特，真係有可能喺一月簽佢番嚟。不過我求大俠反而擔心卜比笠臣遲早激到爆血管！事關紐卡素𠵱家都成大半隊係「曳仔」一族，淨係目前單強姦案，都搞到球隊上下風聲鶴唳。一陣又傳呢個，一陣又傳嗰個，如果再加埋有唔少犯事前科、包括早年曾經同樣牽涉強姦案嘅古華特，你話卜比Sir到時顧得教波定顧得教仔呢？
熱刺主將薛基終於傷愈，好有機會喺下個禮拜聯賽作客李斯特城復出，延續熱刺近期佳績。呢個消息同時亦對前領隊荷杜幾諷刺，因為佢被炒之後，羅比堅尼、普耶及薛基呢幾位主力先至陸續復出，戰績亦得以改善。相信荷杜見到熱刺愈打愈好，只有歎句「時不我與」囉！
我求大俠發覺西班牙波都幾常見開出淨贏一球嘅波膽，好似呢兩晚西班牙盃，就算甲組隊對住啲低組別嘅亦一樣！而其中一場泰拿沙對利雲特，唔知係咪本報名家波王貼咗利隊Ｗ嘅關係，結果利隊由受讓平?半，畀人煲到臨場試過要讓番轉頭。最後當然贏埋啦，你冇跟到就蝕底囉！
日前喺西班牙盃對丙組仔，為巴塞射入奠勝入球嘅朗拿甸奴，因為呢場波拉傷咗大腿肌肉，驗傷後證實要唞七至十日，即係話巴西兩日後約戰牙買加唔使預佢，連下周中足協盃巴塞迎戰SKM貝塞夫都冇佢份。巴塞主場唔掂，冇埋「細哨」唔擔心就假，都係個盃仔累事囉。
好耐冇「野獸」艾蒙度嘅消息啦，點知最新料係佢為華斯高射入扳平一球後，即刻猛嗌窮，話成四個月冇糧出，又話班球迷好支持佢，果然看風駛𢃇，又識搵幫手。華斯高個副會長賽後立即回應話確有其事，但會盡快搞掂，所以如果艾蒙度唔出聲，件事重有排拖。