遙控模型玩具減價！女士們咪以為唔啱Channel諗住轉版。咪以為遙控模型玩具就一定係男人嘅玩意，正所謂「大有大玩，細有細玩」，細細部的遙控直升機就最啱女士們駕駛，容易學又唔難控制，又可以喺屋企玩。適逢減價盛會，所有遙控模型減完等於街價七五折，又點可以執輸，一於勁掃袖珍型遙控直升機，實行大人細路一齊玩。
記者：何善華 攝影：陳陶鈞
Model：Nana（Imagine）
逢星期一至日出版
未夠班買架大大隻嘅遙控飛機喺大空地「鬥放」，不妨試吓呢隻入門版練習一番先！線索操控可飛行超過10米範圍，雙翼設計令直升機平飛時流線型更平穩，而控制方法亦與大型遙控機相同，可插火牛而毋須充電，仿真度與兩三千蚊一部嘅遙控型飛機無異，SellingPoint當然係可以喺屋企玩啦！
記唔記得電影《珍珠港》內的零式戰機？呢隻迷你零式遙控戰機一定可滿足「好戰」嘅你，草綠色機殼配合戰爭保護顏色，像真程度100%。但係想玩之前都要問吓自己，有無時間同精神去砌晒成架戰機！
基本上呢架直升機與Hirobo紅色遙控直升機無太大分別，但由於機身體積較大，相對的操控難度更考玩家嘅駕駛技術，換言之喺室內玩時撞機的「或然率」會相應提高；隨直升機附送CD-Rom一隻，內容會教導遙控直升機的飛行技巧，如果有心想成為一流嘅遙控飛機玩家，呢隻可算「初試提升」之選。
美軍隱形戰機可𠱁得一班小朋友開懷大笑，齊齊爭住玩。不過玩時小心，因為隱形戰機淨重120克，發泡膠機殼容易損毀，時速高達20公里，隨時唔知飛咗去邊搵唔番！
呢架彩雀遙控機色彩繽紛，要玩都方便，只需要充完電就可以即刻「放機」，全自動飛行，最遠可飛行至100步的距離，重會發出鳥翼聲。
TrailMaster大腳車
爬山大腳車，黑色車身設計，攀山越嶺話咁易！
無機會揸真正嘅Ford車？無問題，𠵱家唔使700蚊就可以擁有一部……遙控車而已。
藍色豪華房車「掃把佬」形象深入民心，外剛內柔，2003年新款啱啱到貨，重唔買等幾時呀？
睇到呢個得意玩意，即聯想到秘密武器「血滴子」。遙控掣配合紅外線感應器，可接收三米範圍內Feedback，塑膠設計的外環令UFO發射機不易損爛，點撞都得！但操控時要注意風向和氣流，當然要對準個紅外線感應器先可以穩步上揚向上升啦！
玩遙控飛機要循序漸進。先決條件就係識得保持機身平衡，呢架小型遙控飛機就可以幫你嘗試學習控制機身嘅平衡，玩前將遙控飛機放在控制器天線上面，要Keep住架機唔好跌落嚟。
「海陸空」三合一設計嘅遙控玩具組合，其設計令人想起占士邦。同一時間可以變成滑翔機、潛水艇同埋越野車的玩意，沒有厚此薄彼，一次過滿足晒三個願望㖭。
地址：油麻地東方街5號地下
電話：23840003
營業時間：10:30am-8:00pm（周一至周六）
1:00pm-7:00pm（周日）
