啱啱秋涼，又到咗搞保釣大騷嘅時候嘞。今年輪到飛天朱，好似上咗身咁，自從摟住塊五星旗賀十一飛降完沙灘，又走去釣魚台，點知遭到日本政府出動十艘炮艇、多架直升機，將飛天朱哋擊退，保釣團體連隻船都撞崩埋，搞到落荒潰逃，敗走廈門。㗎仔護島，再次大獲全勝。
釣魚台明明係中國領土，但點解會搞成咁？記得阿松教導過香港人；銀紙搵幾多，都唔係自己嘅，搵咗而識使，啲錢先至真正屬於自己嘅。
釣魚台嘅主權，亦係一樣。中國聲稱擁有主權，不過得個講字，釣魚台摸唔到，上唔到去，自己就蜑家雞見水，人哋日本仔船堅炮利，可以守護，可以登陸，亦隨時喺釣魚台起燈塔、唱K。
即係好似媾女咁。條女已經俾第條仔攬到實一實，鍾意就錫一啖，鍾意又摸兩嘢，人哋日頭糖黐豆咁出街，夜晚同居一齊瞓。你就孤家寡人，條女啲相，就貼滿成牆，但你就通街亂咁嗌，話個女仔係你個老婆仔喎？大廈看更同街坊，係咪應該報警，將你閣下送入青山呢？
釣魚台為日本所佔嘅事實，迨無疑問，可惜呢個世界好多阿Q，好似飛天朱咁樣，想揸塊五星旗一邊揸滑翔機降落釣魚台，日軍炮火無情，一炮打佢落嚟，咁咪冇得上北京見領導人咯？明年人大再開會，香港嗰個小組，位位咪要起立默哀咯？
𠵱家國家尚未正式表態，又點輪到下低啲「愛國口靚」亂嚟？係咪借保釣嚟諷刺國家軟弱？萬一激嬲日本仔，日本政府拒絕批放下一筆日圓低息貸款畀國家，保護釣魚台，咪變咗反中兼衝擊國家經濟改革？
香港係一個經濟城市，釣魚台嘅紛爭，係一個國際政治問題，香港人唔好立亂黐埋去，得閒都係打聽吓，「九一八」班㗎佬喺珠海包起嘅嗰間尋春酒店，啲女靚唔靚，值唔值得香港人平平哋價錢上去梳乎吓？
釣魚台升起支日本旗，唔怕，國家嘅神舟五號就快升空，站得高，看得遠，到時成個宇宙，都係中國領土。
傳真︰2623-9278
電郵︰