新車速報：<br>福特MondeoUltima變得更豪

新車速報：
福特MondeoUltima變得更豪

福特Mondeo車系，響一眾同級日本及歐洲車款中，可謂尺碼至大又見車廂寬敞，最近代理重引入咗Facelifted新版，唔單止造型有貴氣，車廂鋪排亦較前更覺氣派突出，惟車價仍維持響20萬之內，確實係一款價廉物美又超值嘅歐洲行政級座駕首選㗎！

記者、攝影：陳偉林
ImageGirl：Clara
逢星期一至日出版

Facelifted新版鋪排出眾
向來個性獨特嘅福特Mondeo車系，今回推出嘅Facelifted新版，可謂予人一新耳目之感；除改用上電鍍框邊嘅鬼面罩、全新霧燈編排外，重改用上四輪時款16吋跑車合金胎軨、兩側車身白底指揮燈、全新尾燈配搭，還有兩旁門邊鏡下方加設嘅照明裝置，單係呢一身裝潢，經已有一定號召力啦！



車廂設備講究享受高
講到車廂陳設，兩排高級真皮椅，有同級車中至闊落嘅空間感外，四周重加有桃木修飾，而全新中控台設計，豪邁見氣派之餘，重有齊6碟CD高級音響，以及恒溫冷氣系統，而前排除駕駛席備有全方位電控外，乘客席座墊重加設有電控高低調校，少不了還有六個安全氣袋同充氣簾幕組合，置身隔音出眾嘅座艙中，聆聽樂曲至愜意。

■車頭鬼面罩加入電鍍邊鑲嵌，豪邁見貴氣。

■一對Xenon頭燈襯以全新霧燈編排，望落格外惡形惡相。

■後排之間置有大型中央手枕，內附雜物匣及杯座。

■全新中控台設計華麗見氣派，除有6碟CD音響及恒溫冷氣外，重有突出嘅指針時計。

■駕駛席除備有全方位電控調校外，乘客席重附加電動上落按鍵。



底盤穩紮循迹性高
新車沿用一台2.0公升直4Duratec-HE偈，匹配4前速自動波，輸出唔算突出，惟起跑加速有力，又見轉檔順滑，遇有需要時重可以利用OD波作Kick-down或EngineBraking㖭！其次，前輪麥花臣支柱、後輪四連桿式懸掛結構，走彎時既穩妥又見循迹性高，而四輪碟式制動器，附有ABS連EBD裝置，重予人收放自如嘅效果㗎！

■新車整個座艙加入不少桃木修飾，令原來嘅真皮車廂配搭，變得更見貴氣洋溢，就連空間亦見寬敞闊落。

■前排中央手枕愜意見方便，重有齊儲物匣、杯座等組合。

■原廠電天窗前後，除備有獨立照明外，兩旁重備有出入扶手。

■一套電子4前速自動波附OD掣，反應敏捷又順暢。

■四幅式真皮軚環把持恰如其份，左邊重附有音響遙控鍵，操作倍感輕鬆。

福特MondeoUltima四門版小檔案
引擎：1999cc直4DOHC
馬力：145ps/6000rpm
扭力：19.4kgm/4500rpm
傳動：4前速自動波，前輪驅動
尺碼：4731×1812×1429mm
軸距：2754mm；車重：1419kg
新車售價：$199,900
車輛提供：福特香港（25031032）

■新車沿用一代2.0公升Duratec-HE偈，輸出平均有力，加埋出眾懸掛配搭，同級車中可謂無出其右。

記者評語：樣靚表現佳
經過Facelifted後，新版福特MondeoUltima外形倍添成熟貴氣外，車廂陳設亦較前講究得多；而一台2.0公升Duratec-HE引擎，匹配電子4前速自動波，輸出強而有力又見反應敏捷，響同級車中，無論性能、設備及空間感，亦可謂冠絕同儕。

Clara評語：乘坐舒適度十足
部車造型獨特之餘，重好有歐洲高級轎車風采，置身其中空間寬敞，一套皮椅又見貼服舒適，加上四周桃木配襯，響寧靜環境下聆聽悠揚樂曲，至為賞心悅目。