港滙噚日無進一步偏軟，好友繼續狂掃中資電訊股，托高恒指至11800收市，全日升79點，成交190億元，港股又再成為好友天下。ING發出警告，港股已連升6個月，歷史話畀佢哋聽，股市連升5個月，通常會有調整。不過，經驗話畀阿虎知，對沖基金永遠將個市挾高或者質低到你唔信。
滙盈（8101）已停牌3日，聽聞如無意外今日可復牌。ｉ師傅話，滙盈獲得澳娛一份賭場監察系統（監察賭場情況及吼吓有冇人出千）合約，價值5555萬元，據聞可以穩賺2000萬元，呢筆盈利對一間市值僅2億元公司來說非常可觀。
據ｉ師傅話，澳娛獲得賭牌其中一項條件，係投資改善賭場設施。以美國賭場為例，資本開支中有三分之一投資於科技，以澳娛總投資30億元計，即係有大約10億元會投資於科技，基於燊哥與滙盈嘅關係，滙盈所獲得的超筍合約可能陸續有來。滙盈至今未正式炒作過，聽聞此股有心成為一隻具賭業概念嘅基金愛股，不甘於只做一隻普通炒股。
國企股噚日炒個不亦樂乎，其中預期第3季盈利會增長逾50%的儀征化纖（1033）勁升17.6%，收1.54元，成交高達3.71億元，上海石化（338）升9.5%、鎮海煉化（1128）、吉化（368）及燕化（325）亦升4至6%。有國內朋友話畀阿虎知，國內化工產品將調高售價，照計有排炒，可惜聽聞唔少大基金先前早已增持，並預備在業績公布後出貨獲利，跟炒要睇時間落車。
阿 虎