雖然亞Mark講經濟真係一竅不通，但近排美元回軟，搞到同佢掛鈎嘅港元滙價亦大跌，響日圓同歐元走勢強勁下，一班汽車平衡進口商，早排經已事先張揚咁話車價勢將調升喎！至於香港一班汽車代理，亞Mark亦聽聞佢哋陸續會有行動，相信最先發難會係富士代理，皆因佢哋分別低於市價，推售新款ImprezaWRX車系同全新Legacy型號；據知嚟緊兩個車系售價會調升多10%，若然唔想買貴車的話，就真係要行快一步落訂喇！然而，另一邊廂嘅豐田，早陣子推出全新第2代環保汽車嘅Prius，重將車價由原來19萬5千，減到只係16萬9千，限量十部迅即售罄，惟亞Mark聽聞有興趣嘅買家，重可以用呢個優惠價訂車噃！呢部造型咁In又見跑意嘅新一代Prius，起初廠方預期月銷都不過3千部上落，怎知東瀛首月銷量便高達1萬7千多部，響香港以唔使17萬嘅車價便可擁有，又真係幾有號召力㗎！