老布殊前晚喺香港出席咗一個晚宴，發表咗啲中美關係嘅行貨講話，漏夜坐私人飛機去北京，噚日應該同江澤民、胡錦濤及由印尼返國嘅溫家寶會面。
老布殊總統亞洲之行，係由美國TheCarlyleGroup搭線，八方去搵吓資料，先知係呢個卡拉幫來頭不小，老布殊重係佢嘅亞洲區高級顧問，唔怪得咁落力。
TheCarlyleGroup（凱雷集團）成立於一九八七年，自命為全球最大嘅私人投資公司，顧問委員個個都大有來頭，唔係前總統、首相，就係政府高官，或者係猛料之人，好似老布殊、馬卓安、美國前幕僚長貝克，甚至大陸嘅太子黨陳元同王軍都係佢哋嘅顧問，真係巴閉。
話時話，老董前幾年，搞咗個「國際顧問委員會」，搵班國際猛鬼嚟香港，話一年開一次會。今時今日，呢班猛鬼都已經作鳥獸散，「國際顧問委員會」好似不存在咁，唔知係咪覺得阿董冇得教呢？若果係，阿董重見老布殊，又學到啲乜呢？
傳真︰2623-9278
電郵︰