荷李活明星「未來戰士」阿諾舒華辛力加當上了加州州長，有人話佢以形象取勝，有人就話佢對手太弱，不過，前晚重喺香港訪問嘅老布殊就讚佢夠loyal（忠心），由頭到尾都支持共和黨，所以勝出。
喺美國，政黨政治好成熟，所以每次選舉都壁壘分明，民主黨嘅戴維斯搞唔掂經濟，共和黨就有機可乘，實行罷免州長，另選高人。
阿諾得唔得要遲吓先知，但係人哋個機制就證實咗掂，反觀香港，想罷免老董要過五關斬六將，根據《基本法》規定，如果要老董辭職，除非老董患重病無法履行職責；或者三次拒簽立法會通過嘅法案，或者同立法會就財政預算案對着幹。
至於如果想彈劾佢老人家，就要先有四分之一嘅立法會議員指控佢有嚴重違法或瀆職，然後再進行調查，最後就算立法會通過，重要報請中央政府決定，即係話一定唔會罷免成功啦！
傳真︰2623-9278
電郵︰