早排發展商成日安排啲內地團嚟香港睇樓，播咗咁耐種，擺咗咁多心機，最近終於有收成。之前和黃一班內地團嚟香港睇藍澄灣，和黃地產徐建東就話，其中3個買家已經揀啱咗單位，同銀行傾埋啲付款細節，就可以正式入市，3個買家打算一人買一個單位，夾夾埋埋成650萬。
另外，藍澄灣同Sony（新力）合作搞搞新意思，由10月10日起，頭10個買家就送1.8萬蚊嘅購物禮券，用嚟買最新嘅SonyWEGATheate系列產品，將屋企變身做家庭影院；重連舊買家都照顧埋，佢哋買以上產品亦有八五折優惠。
聽工作人員講，𠵱家放喺藍澄灣兩個示範單位嘅同系列產品，總值10萬，而市面上一套音響組合連等離子電視就承惠7萬蚊，如果買家想執齊一套，睇嚟都要自己補貼番啲先至得啦。
噚日係新昌營造姊妹公司──新昌管理上市嘅大日子，已退休的新昌營造前主席葉謀遵喺上市儀式表現雀躍，除擁吻女兒葉儀皓外，又大談退休生活。佢同蘭西話自己退下火線，畀仔女上陣，除非需要佢嘅關係網絡，否則唔會過問公司業務。
葉謀遵又話同仔女好有默契，就以工作態度來講，佢放手後只做股東，仔女亦有呢個念頭，就係遇上有能者時便會退位讓賢，好似新昌管理本來由女兒負責，但現已退任副主席；至於新昌營造嘅葉維義，亦有意5年內退任主席，皆因仔女同佢都覺得任何生意都應該引入專業人士管理，否則若下一代冇興趣，家族生意便後繼無人。
投資移民政策出台，可唔可以成功吸引外資言之尚早。但係，近排的確多咗外國資金，出擊吸納香港物業收租。最新有位馬來西亞華僑，一筆過畀晒錢，買咗個屯門時代廣場單位收租，個單位係E座中層7號室，364方呎，成交價53萬元。同類單位市值租金最高近4000銀，回報最高去到9厘，都幾和味。
聽中原周彩霞轉述，位馬拉華僑打算遲吓進一步增持香港物業，重會出擊港股市場，打算將來移民香港咁話。港府個移民政策一直俾人彈話金額過高，原來都有唔少外國豪客認為值得。
員工係一間公司嘅重要資產，新鴻基地產深明此理，所以特別關心員工嘅健康。之前就派送防炎湯，到近排踏入秋冬，流行性感冒咁犀利，新地就特別安排醫生同護士，親身到新鴻基中心嘅總部，幫員工打預防流感針。佢哋嘅應變能力果然有番咁上下，連對付啲流行疾病反應都咁快。
新地重話，有一半員工報名參加；咁重唔止，就連員工家屬，都可以用優惠價去診所打針，果然做得好「全面」。員工身體健康，做嘢都可以得心應手啲，確實大家都有得益。
美聯物業同繪畫比賽竟然可以扯上關係？之唔係因為做善事。
美聯旗下有個慈善組織叫美善會，將會喺今個月19號，在將軍澳東港城商場舉辦「未來香港新建設」繪畫比賽，歡迎3至15歲嘅小朋友參加，按年齡分開初級同高級組比賽。獎品除咗有獎學金同獎狀之外，重會有畫具一套。
至於得獎作品就會製成聖誕卡，放喺美聯分行出售，扣除成本後，全數金額捐贈「麥當勞叔叔之家」，幫助癌症兒童，有得玩又可以聯誼，重順手做埋宣傳兼善事，黃老闆果然有諗頭。
蘭西
電郵地址：
