大市在禮拜三即日調整後，噚日又再升過，隔咗一晚，市場氣氛有天淵之別，噚日全日都見有大手掃貨場面，特別係國企股，基金同大行志在買貨，價錢已唔重要。大市成交190億元，國企佔52億，又創近期高紀錄。
恒指收11800，升79點，期指收報11853，升113點，高水53點，熱錢重係源源入注，散戶就繼續減磅，結果貨源盡入強者手中，後市真係可以起到你唔信（當然係在調整之後）。
美林認為家吓港股係由資金推動，若以PE計算，目前港股係昂貴，但如果按資金流向分析，短期內港股出現調整後，有力再展升浪，恒指上升目標指向12800，所以維持對港股正面嘅看法。
噚日同芬佬傾開，佢哋話美股個勢亦好強，短期內有力再創新高，牽動之下，港股短期嘅升勢重可能會拖多一兩個禮拜，恒指或會升穿12000大關，喺12000至12200之間見頂後，先會掉頭。
汽車股好犀利，早輪推介嘅駿威（203）同華晨（1114），全部到價，慶鈴汽車（1122）噚日亦發力，相比之下，慶鈴大落後，有得諗。
另外，呢輪推介過創業板兩隻實力股，東大照明（8229）噚日已升到上0.485元，比推介時的0.36元，大升34.7%；另外一隻係蜂蜂（8156），推介後曾跌咗幾個位，噚日上番0.91元，聽講短期內會有好消息，今次有機會衝破1.0元阻力，再創新高。
中國製藥（1093）8月中配股後，足足消化咗個半月，中藥大股東石家莊製藥「披成」8000萬股，作價2.65元，大部份由機構投資者接去，但聽聞佢哋唔夠喉，所以重好有耐性，在市場收集咗個幾月，呢一輪有後來者加入搶貨，股價先由低位回升。
今年6月中，中藥股價曾高見3.1元，之後調整咗幾個月，基金咁有耐性，無非係要食大茶飯，睇形勢已經收夠貨，相信好快會開車。
中藥業績靚，03年度（12月年結）的上半年，盈利3.59億元，大升255%，每股盈利23.92仙，估計全年盈利7.3億元，每股盈利48.6仙，家吓國企熱火撩天，就算以保守的9倍PE計，中藥股價已可見4.3元，預期升幅逾60%！
郭兆誠