古巨基的新歌《必殺技》由林夕填詞，歌詞恰巧與基仔過去一段悲慘愛情經歷十分相似。基仔以往曾經有過一個常玩失蹤的女友，他感到十分沮喪和無奈，但事過境遷，他現在已不再恨對方。
古巨基下月初推出以遊戲機為概念的廣東大碟，一向喜歡打機的基仔日前到石澳接受訪問，並說：「今次所有歌名都係以game嘅名或者術語命名，好似《必殺技》係打機術語、《任天堂流淚》就唔使講啦，重有《決戰十一》同《真女神轉生》都係遊戲名。」
一年多沒有出廣東碟，基仔表示不覺有太大壓力，他說：「經理人同我講，𠵱家返嚟出碟其實唔算遲，因為過去兩年香港唱片業都冇乜前進，我冇乜損失。𠵱家賣碟最多同賣得最差嘅距離唔係好大，所以我一啲壓力都冇。」
基仔又表示他告訴填詞人林夕新碟將以打遊戲機為概念時，林夕竟找來一本遊戲機百科全書作參考，並想出很多有關內容作填詞資料，令他為之驚喜。
最讓基仔震驚的是新歌《必殺技》中林夕所寫的歌詞，與他過去一段情十分相似，基仔說：「首歌係講個女仔鍾意嘅時候就出現，突然間會走咗去，搵都搵唔到。喺你好沮喪嘅時候，佢又忽然間搵番你，你會頂唔順理佢㗎喎，重複又重複，搞到個男仔好痛苦。」
原來當年基仔和女友相識三個月，一直十分甜蜜，突然女友變得若即若離，他說：「佢要搵你就自動出現，我可以做嘅就係等電話，諗番起真係一種折磨。到佢出現時，你就唔想嘥時間去嬲佢，因為唔知幾時佢又玩失蹤。」基仔當時很氣憤，但現在已不再恨對方，如果對方再出現，或許雙方可以做好朋友。
採訪：蔡如育
攝影：仇志德
化妝：PuiPuiWong
髮型：NicolebyHair
