一向自視甚高嘅荷李活影壇，近年似乎愈嚟愈睇重東方電影，改編自《午夜凶鈴》嘅《七夜冤靈》喺美國大收，所以最近接連聽到《我老婆係大佬》等戲都重拍荷李活版，而相當受歡迎嘅日本電影《談談情．跳跳舞》，最近都積極拍攝緊新版《ShallWeDance?》。
其實《談》片已經係九六年嘅電影，雖然事隔七、八年先重拍，已經冇咗時間優勢，不過今次Miramax肯投資，重搵嚟李察基爾（RichardGere）、珍妮花洛庇絲（JenniferLopez）同蘇珊莎朗頓（SusanSarandon）幾位巨星演出，睇嚟呢次真係志在必得，相信部戲下年上畫應該相當矚目。
呢部戲嘅情節同原裝版本一樣，都係講一個工作壓力好大嘅打工仔，喺夜晚學跳舞減壓。事實上，李察喺拍過《芝加哥》後，對跳舞信心大咗。今次佢扮演會計師，從跳舞發現咗新生活，一方面佢俾飾演舞蹈教師嘅籮霸美妙舞姿吸引住，而情迷跳舞，而另一方面，李察亦發現佢從跳舞學識點樣面對生活難題，包括同蘇珊扮演嘅太太嘅婚姻問題。
至於籮霸，我羅拉聽聞Miramax宣傳新片《JerseyGirls》時會抽起晒有佢同班亞弗力（BenAffleck）兩個嘜頭嘅海報，轉而將重點放喺導演身上。講開班仔，之前佢牽涉恐嚇女子嘅指控，因為唔夠證據而撤銷咗。