有一個半紅不黑嘅電視女藝人，佢最近秘密產女，其實𠵱家呢個年代做未婚媽媽都冇乜所謂，大家都唔會用歧視眼光去睇佢，之但係馮仁昭聽聞個BB一出世，好不幸係有缺陷嘅，真係好可憐。
馮仁昭都好關心個BB嘅情況，據知嗰個女藝員自從入咗娛樂圈，知道喺呢行搵食，唔keep住個靚樣都幾難，所以佢尤其注重自己嘅身形，成日食減肥藥保持體態，個女藝員愈食愈犀利，佢可以一日啪幾十粒減肥藥。
喺懷孕嘅期間，佢又怕生完未及收身俾人發現未婚生仔，所以陀住BB都繼續食減肥藥，結果佢生完係體態好fit，只可惜減肥藥嘅副作用發晒喺BB身上，搞到BB一出世就有缺陷，認真冇陰功。
馮仁昭覺得嗰個女藝員真係累人累己，係人都知道懷孕期間唔可以亂食藥㗎啦，𠵱家睇怕佢都好傷心，但後悔都太遲咯。
薛家燕（好姨）同苑瓊丹噚日喺九龍城拍攝無綫劇集《皆大歡喜》，吳啟華被周刊指喺北京拖女返酒店，好姨同苑仔噚日就好抵死咁，即場重演吳啟華拖女嘅搞笑畫面。苑仔話咁樣玩冇惡意，只係開吓玩笑啫。不過唔知吳啓華睇到會唔會笑得出呢？
陳啟泰噚日喺亞視搞咗個資訊節目《食出奇蹟》嘅記者會，佢身穿電單車手嘅衫同戴黑超，重搵埋寶馬借電單車載住佢出場，搞到好型仔咁。佢話喺節目入面，會揸住架電單車周圍搵啲有好嘢食嘅舖頭。問過佢會唔會覺得揸架「皮包鐵」好危險，佢話：「梗係唔會，我揸電單車都係諗住兜吓風，老婆都好贊成我揸。」
今日係台灣嘅雙十節，蔡依林將會喺台灣嘅總統府演出，蔡依林知道要演出嘅時候，都好擔心會引起政治敏感，最擔心就係發生張惠妹嗰次嘅事件，引來北京政府嘅封殺。馮仁昭覺得大家都好緊張內地咁大嘅巿場，不過張惠妹𠵱家都冇事，可以喺內地演出，蔡依林應該都唔會有問題啩！
Cookies成員之一嘅Kary噚日一個人喺新城接受訪問，佢獨唱嘅歌《不是校花》成績非常好，喺流行榜成績唔錯，問佢點解唔作個人發展，佢話因為冇膽喎，就算好似咁樣一個人做訪問都有啲驚。但如果佢可以諗吓一個人發展所賺嘅錢唔使再分四份，或者佢可能即刻覺得唔驚呢！
專做和音、把聲好靚嘅張偉文，會喺下個星期六喺灣仔伊館開一場「唱好女人演唱會」。噚日佢喺尖沙嘴開記者會，請嚟呂珊、韋綺珊做嘉賓。張偉文話今次收到接近十萬歌酬，門票亦賣咗九成，而佢張唱片《唱好女人》一樣好好賣，賣咗五萬張，好過𠵱家啲偶像歌手好多。張偉文話覺得只係對象唔同，不過連佢自己都話聽新人嘅歌有代溝唔啱聽。
陳劍聲、南鳳同梁漢威噚日喺逸東酒店出席《梨園四泰斗》記者會，名伶林家聲細仔日前自殺身亡，呢班老倌都話件事令人心酸，而威哥就話當晚發生呢件事時，家聲哥正喺多倫多欣賞佢演出。自己之後一直聯絡唔到對方，佢哋都希望聲哥兩公婆節哀順變，處理完個仔身後事之後，好好保重身體。
