黃伊汶（Emme）日前邀請儍強杜汶澤為其新歌《愛失救》擔任MV男角，由於她在MV中癡戀儍強，兩人更拍攝一場床上親熱鏡頭，Emme還大讚儍強好man。
黃伊汶日前在龍蝦灣一間大屋，為其新歌《愛失救》拍攝MV，而她更親自邀請在《無間道》一片中飾演儍強而上位的杜汶澤擔任MV男主角，原來Emme早前在廣州拍電視劇《功夫足球》時，與儍強結緣，二人因此而熟絡，故她這次便邀對方助陣拍攝。
Emme日前在電話中說：「我嗰日膽粗粗打畀阿澤，叫佢幫手，佢叫我畀個理由佢，我話佢好型囉，阿澤俾人嘅感覺好似好cool，其實我覺得佢沉默嗰陣好man，我都幾鍾意佢㗎，佢係性格演員，見佢呢排又紅喎，所以就請佢幫手囉。」
MV內容講述Emme狂戀儍強，迷戀程度竟嚴重到學對方抽煙的惡習，而她與儍強還有一場床上親熱戲，由於Emme比儍強高，導演要以鏡頭遷就拍攝，兩人「瞓低」在床上拍攝時，在高度上就最為合襯。
Emme笑說：「嗰日導演要求我哋親熱啲，我同佢就攬埋一嚿，叫係一場床上戲啦，之後我重要企喺度攬實佢，差唔多好似嘴對嘴咁，不過拍出嚟嘅效果就好好，大家都好滿意。」
當晚杜汶澤通宵為Emme拍MV，Emme也相當識做，預先購買啤酒，還有凍蟹及蝦等大堆潮州打冷美食，與阿澤一起飲啤酒及消夜，以謝對方友情相助。
採訪：朱倬誼
