恒地（012）批股，前日打窒啲地產股。昨日批股陰影似成過去，地產股再有勢。4大地產股中，新世界（017）帶頭，收6.80元，有3.8%進帳。其次長實（001）都唔太執輸，升2%，收64.50元。新世界冇輪，唔好講佢。
長實周初最高67元，𠵱家重有水位。大市欲罷不能，喺紅籌國企帶動下，有機繼續上衝，長實再試上次高位，然後破位，機會亦好大，炒吓長實Call輪，搵米之道。
昨日提及兩隻長實Call輪9065同9074，係正常輪，9065成交金額係正常輪中最大，繼續睇好，明年3月到期，輪價89仙，溢價6.8%，槓桿率7.2倍。9065昨日升9仙，9074升得慢啲，只有5仙，呢件如果唔嫌交投疏啲，更加抵買，隻輪明年6月到期，輪價1.03元，溢價5.9%，槓桿率6.3倍。
長實Call輪其實重有兩件好抵買，9756同9862。兩隻輪啲數據都唔錯，弊在交投好少或者一片空白。
九倉（004）昨急彈，不妨昅住隻長命Call輪9086。明年11月到期，輪價46仙，溢價6.1%，槓桿率4.6倍。淨係有逾1年期壽命，已經好抵玩。
章盛