早在上個月頭，小初提過班高球波友推介航天科技通信（1185），話隻股將會有得炒，點知等咗好耐都未見動靜，直至噚日股價先至有異動，大升9.6%，收0.455元，成交金額急增至1848萬元。
航通阿媽航天科技（031）表現更矚目，一條氣衝上全年高位，收0.67元，勁升17.54%，成交金額就更加勁，有成5787萬元。
小初打電話畀其中一位波友，佢話航科兩母子雖然同時勁升，但兩股其實係由唔同人主理。兩隻股都係炒復甦、轉虧為盈嘅概念，但佢就比較了解阿仔多過阿媽，航科自97年分拆航通上市以來，兩隻股票幕後炒家其實係有多少唔同。
波友表示佢較為鍾意阿仔，皆因市值唔夠4億元，細細粒容易食，加上又較熟幕後炒家。
航通上個月以每股0.30元，配售4000萬股新股，集資淨額1140萬元，聽講批貨大部份落入友好人士手上，隻股剛剛起步炒上，估計冇咁快散到出街，現時應該重有得炒。
慕容小初