幾位朋友嘅仔女喺倫敦讀書，LSE（倫敦經濟及政治學院）、UCL（大學學院）、帝國學院、英皇學院都有，均屬倫敦大學系統。外國學生嘅一年學費近八九千鎊，唔算認真貴，但係分配唔到學生宿舍嘅話就比較麻煩，因為租金與食用並不容易負擔。
呢日見到做完記者就去LSE讀碩士、跟住轉行做公關嘅靚女S，問佢對大學印象如何，靚女S話：「LSE位於鬧區，我喺商業大廈上堂，完全冇大學校園感覺，似用錢買個學位而已。」冇所謂咯，學校名氣大，攞個學位對轉行搵工好有作用。靚女S等人，對倫敦生活幾有美好回憶（除咗生活費之外），因為城市好有文化，博物館、圖書館、藝術館、書局、劇院林立，平時讀書讀到悶，就可以周圍去參觀，享受歷史文化，儲夠錢就過大海去巴黎行吓街，勝過喺香港睇填海。博士F就同左丁山講過：「住過倫敦兩三年先知道乜嘢叫做文化。任何現代才子都應該有倫敦生活體驗。」
現代才子留在香港無非係搵食啫，最好就係盡快搵夠之後，就卜居大倫敦地區。博士F話香港係一個唔尊重歷史文化生活嘅地方，只係尊重市場，任何有知識有才氣之人，要懂得市場遊戲規則，爭取市場最高工資、酬勞，千祈唔好怕醜，習染啲頭巾氣，傳統文人着重老闆禮賢下士，俾老闆搵晒笨，剝削工錢，現代才子要識得價高者得嘅道理，唔係點可以去倫敦退隱呀！