個市認真反覆，埋單恒指微跌3點，好似和氣收場，但即日高低波幅達236點。萬二關前，炒家貪婪與恐懼交織，時好時淡難免。
仍然係電訊股天下，中移動（941）再升75仙，先3日推介嘅中移動Call輪9861，有買嘅賺到笑。電盈（008）亦升，進帳10仙，收5.45元。通街唱話電盈去馬。
電盈近期走勢一級級上，好有節奏，未升完，可以諗吓炒電盈Call輪，正路主角9791，明年3月夠鐘，大把時間，輪價1.18元，溢價4.2%，槓桿率4.6倍。想搏殺，揀槓桿率大啲、爆炸力強啲嘅9766，自然要冒較高風險，隻輪剩番1個月命仔，輪價35仙，溢價2.8%，槓桿率15.6倍。
和黃（013）企定喺59元，但Call輪9914則升16%，即11仙，當正正股升1.10元嚟炒。裏面有乜微言大義，可能係正股就嚟有得威，Call輪先行。
和黃若然再升，則身為大股東嘅長實（001），亦應該有啲運仔行吓。等長實再跌些少，可以諗吓買啲Call輪。對象有9065同9074。講壽命、數據，9074靚啲，弊在交投唔多。
章 盛