九龍灣企業廣場3期好快推賣，意向呎價2000，較2期造價高約一成；但呢幢商廈擁有嶄新外形，橢圓形嘅設計，每層享有270度海景，加埋較一般商廈反光度更低嘅玻璃幕牆，以及採用新式建築方法，相信同區難尋。不過，對買家而言是否物超所值，則見仁見智！
負責大廈設計嘅巴馬丹拿建築及工程有限公司，建築師張家豪介紹，大廈外形簡單直接，橢圓形配合全玻璃幕牆，突出極具現代感嘅一面。公司董事李明嫻重話，大廈九成建築工序，都唔使喺地盤施工，可以控制質素；採用較低反光度玻璃幕牆，令用戶日夜都可欣賞窗外海景，喺香港比較少見。
設計呢幢全九龍灣最高嘅甲級商廈，對巴馬丹拿嚟講可謂駕輕就熟，因為佢哋經驗豐富，好似中環交易廣場、娛樂行等名廈，都由佢哋一手包辦。
西九龍新盤排住隊入伙，淨係區內嘅昇悅居、泓景臺同宇晴軒，重有恒隆嘅深盛路項目，可賣單位就有成2800個，咁大嘅市場，加上西鐵就快通車，接駁埋地鐵，商機無限。
中原地產睇到呢個商機，率先以6位數字租金承租咗昇悅居商場地下一個1600呎、樓底超過12呎嘅巨型地舖，作為西九龍區重要據點。
聽分行掌舵人林偉文話，配合該區未來發展，準備大肆擴軍。新分行將有60人坐鎮。現時西九龍同華景分行前線營業員60人，配合新分行開張，將增聘60人，連同一姐（劉瑛琳）統領嘅新九龍百多名前線員工，實行用強大兵力搶佔嗰區嘅市場。
美聯物業9月勁賺，向後勤員工派發最高1個月花紅，原本今個月尾至有得出，但𠵱家提早至噚日，一眾後勤梗係開心啦，主席黃建業叫啲同事收到錢後，記得要去幫手刺激本地消費。假如美聯跟住嚟都有賺錢，每個月分花紅，相信員工一定放心大事消費。
另外，中原地產9月搞嘅「億元佣金大獎」，果然催谷到生意，決定繼續兼加碼，新增設佣金250萬以上送2.5萬；300萬或以上畀3萬。另加宗數獎，做到30宗畀3000；40送4000；50畀5000，等啲做細價樓嘅分行都有得參與。連續兩個月達標，獎金重加多兩成。
蘭西前日聽市場人士講，電盈基建主席李智康會離開公司，但因為佢放緊假，唔喺香港，冇辦法即時求證，不過噚日佢就透過第三者，向蘭西澄清冇件咁事，重爆料話自己身處莫斯科，幫薄扶林貝沙灣第三期搜購古董。
咁即係話第日貝沙灣第三期，其中一個賣點係莫斯科風情啦。
近年發展商好興預留啲單位，去外地路演促銷。針對港府新推嘅投資移民政策，啱啱成立新部門嘅利嘉閣地產，都話會到東南亞巡迴路演，集團董事總經理何紹章（圖三中）同蘭西講，當政策細則進一步公布後，集團考慮去澳門、菲律賓、印尼、馬來西亞等地做宣傳，又話會喺當地雜誌、報章賣廣告。
搞到咁大陣仗，主要因為佢哋認為投資移民政策潛在無限商機，估計新部門嘅成立，將為公司營業額帶嚟10至15%嘅增幅。同佢哋合作嘅法律顧問楊敏健律師透露，該行接獲340個投資移民查詢，大多數選擇地產做投資項目，客戶嚟自台灣、印尼等地。
蘭西
電郵地址：
