港股噚日真係風高浪急，波濤洶湧，走勢急升驟降，有如過山車，恒指高低相差逾230點，最高報11885，大升162點，再創今個升浪新高，同12000大關距離又近咗一步，但中午過後，行情反覆走軟，下晝市重急挫，最低落到11648，倒跌74點，尾市上番11720收，微跌3點，成交190億元，即月期指高水20點。
基金同大戶揸重貨，照常理推測，大市只會調整，而唔會大跌，噚日下晝由高位急插一段，似屬震倉性質居多，大戶無非想衝擊散戶嘅信心，令佢哋唔敢揸貨，自己玩晒。
噚日下跌股（不計認股證）又超過300隻，散戶繼續減磅，且戰且走，噚日下晝嚇一嚇，好多連倉底貨都震埋出嚟。不過，大市遲早要調整，散戶勝在轉身靈活，好快可以補番倉，唔似大戶買貨要部署幾個月。
芬佬話國企會炒番轉，果然有料到，噚日大部份H股都有表現，最勁係青島啤酒（168）收8.5元，大升0.95元，升幅12.58%，亦係第一隻H股股價超越A股（噚日收8.94元人民幣，折8.3港元）。鋼鐵同石化股嘅大行買盤又轉活躍，3隻鋼鐵股升幅由3.2%至5.4%不等；石化股以儀征化纖（1033）最勁，升6.5%，吉林化工（368）亦有2.3%進帳。
中國定下長遠策略，要重振東三省經濟，消息對東北概念股有刺激，噚日深滬股市國慶長假後復市，走勢向好，東北概念股中以吉林化纖升8%，同長春高新漲停板表現最勁，吉林化工A股由於最近才復牌，股價已上升頗多，但噚日仍有5仙進帳，收5.35元人民幣（折5.05港元）。現時的大趨勢係A股與H股的股價差距逐步收窄，對折讓達74%的吉化H股而言，着實吸引。
吉化上半年轉盈，賺2.43億元人民幣，估計全年可賺5.2億元人民幣，每股盈利折算14.1港仙，預測PE僅9.5倍。儀征化纖噚日急升，主要係有大行出報告推介買入，但佢03年PE仍高達40倍，04年19倍，相比之下，吉化又多一樣吸引，即使以12倍PE計，吉化已可穩企在1.7元水平。
上月中，吉化由1.07元回升，到1.31元始調整，形成旗形，噚日破位而上，且有5580萬股的大成交支持，升勢確認，照度上去，最少可見1.55元。
郭兆誠