荷李活「大隻佬」阿諾舒華辛力加當選加州州長，雖然佢之前俾人掟雞蛋，又俾人爆出連串性騷擾女性嘅醜聞，但阿諾喺噚日終於如願以償，對佢嚟講真算係守得雲開咯。
噚晚劉德華同張栢芝喺尖沙嘴出席電影《大隻佬》慶功，對於阿諾做咗州長，華仔呢個本地「大隻佬」就話對阿諾當選冇意見，因為佢都唔識政治，問佢有冇興趣從政，華仔就抵死咁話：「我細個一早做咗廳長，我阿媽要我瞓廳，大個都做過班長，𠵱家就做加多利山山寨王，我冇乜意思從政或者做州長喎。」怕且華仔呢啲就叫做做慣乞兒懶做官啦。
同華仔一齊出席慶功嘅張栢芝就覺得阿諾當選好合理，但佢覺得有人用啲負面新聞去攻擊大隻佬就好唔公平，唔知栢芝係咪因為自己負面新聞多籮籮，有感而發，所以力撐大隻佬州長。
劉丹曾經喺香港選過區議會議員但落敗，佢一直都好留意大隻佬，劉丹話：「佢嗰次俾人掟雞蛋真係好慘，但更加激勵佢同佢嘅擁躉，唔係衰晒嘅，我一路估佢得，話佢性騷擾人都係政治目的啫。」
歐陽震華（Bobby）同陶大宇噚日喺何文田拍攝《青出於藍》，對於吳啟華涉召妓一事，Bobby一反過往口多多嘅性格，話唔表態，佢話每逢自己出外工作，老婆必定同行，而且平日自己十呎範圍之內只會有兩老出現，分別係佢老婆同佢老媽。Bobby又話兩個人一齊最緊要係坦誠，Bobby講咁多嘢，都係想話畀人知佢係好男人啫。
鍾楚紅早排接受台灣傳媒訪問，提到結婚咁多年都冇生細路，佢話唔鍾意生仔，因為有咗仔女之後，佢會無晒自由咁話，𠵱家二人世界嘅生活都過得好好。鍾楚紅重話養貓都好開心，所以佢都將啲貓當做自己嘅仔女。不過我馮仁昭始終都想睇吓，佢兩公婆孕育出嚟嘅後代會係點喎！
薛家燕（好姨）日前喺將軍澳為「金鑽皇」擔任剪綵嘉賓，大會送咗套十幾萬嘅首飾畀好姨當酬勞，好姨話呢間金行會贊助佢過百萬嘅鑽飾出席下周日（十二日）無綫嘅「五鼎祭祀」儀式，馮仁昭知道好姨呢幾年拍廣告都賺到豬籠入水，好姨咁好搵，其實同佢平時識做人有關，學劉德華話齋，呢個世界有因就有果，唔使羨慕人嘅。
關心妍噚日去咗銅鑼灣一間時裝店嘅五周年派對，佢同時裝舖老闆好熟，對方重送咗套新衫畀佢，不過關心妍因為覺得太性感，所以要預先打底先敢着。當關心妍同吳家樂、洪天明合照，踎喺佢前面嘅洪天明喺度玩，又問佢要唔要挨後啲，但咁樣就好易會碰到關心妍個胸，點知關心妍話：「我唔介意，佢哋都係搞笑啫。」馮仁昭覺得關心妍咁大方，係咪想博出位呀？
